Shillong Risaw 13: Ki riewngeit Hindu kiba sah ha jylla bad ha nongbah Shillong, kila pynkut noh hynne ka sngi U Blei ia ka lehniam Durga Puja ha kaba da ki hajar ngut ki riewngeit na kylleng ki jaka, kila pyndep iaka jingpynngam um ne ka Bret Blei hapoh Wahumkhrah da ka jingsngewbha ha ryngkat bad ka shad kmen.
Kane ka jingleh niam kaba 4 sngi lynter, kala sdang naduh ka 10 tarik haduh ka 13 tarik u bnai Risaw bad la pynkut ia kane ka lehniam kaba shisien shisnem da kaba pynngam noh ia ki Bleithaw ha ki wah.
Kane ka jingbret Bleithaw kala sdang naduh ka por mynstep ha kaba ki riewngeit Hindu ha nongbah Shillong, kila iamih na la ki Puja Pandal ban bud iaka kali kaba kit iaka Bleithaw bad kila leit bret ia ki Bleithaw ha Wahumkhrah.
Ki nongialam jongka Central Puja Committee, kila iathuh ba mynta u snem, ki don kumba 250 tylli ki Puja Mandal Committee ha ka jylla Meghalaya bad tang ha nongbah Shillong ki don kumba 64 tylli.
La sakhi ruh ba ki pulit ki la pynjur bha ia ka jingpahara ha kylleng ki jaka ban pynthikna ba kane ka jinglehniam lehrukom ki Hindu kan long kaba iaid beit iaid ryntih.
