Shillong, Risaw 11: U Myntri Rangbah ka jylla u Conrad K Sangma, hynne ka sngi ula leit jurip ia ka surok kaba na Wansing Bazar shaduh Dorrengre.
U Conrad K Sangma, ula ong ia ki paidbah bad ia ki nongialam shnong ba ka long kaba donkam ban shna noh ia ka surok.
“Kane ka surok na Dalu-Gambegre kadei kaba jan bha bad ka Tura bad ka long ruh kaba kongsan bha ia ki paidbah ha ka thain bad haba ki paidbah ki wan iakynduh ia nga, ki ju pynsngew man la ka por ia ka jingdonkam ban shna noh ia katei ka surok. Nga dap da ka jingsngewkmen ban pytnip sha phi mynta ka sngi ba ka DPR na ka bynta katei ka surok la pynkhreh da ka tnad PWD bad shen yn sa sdang noh ia ka kam” la ong u Myntri Rangbah.
Ka surok na Wansing Bazar sha Dorrenge ka long kumba 5.5 Km bad yn tei ha ka jinglut kaba kot T.5.56 Klur.
Ki nongshong shnong kila pynsngew ruh ha u Myntri Rangbah ha kaba iadei bad ka Chisakgre Sub Centre ha kaba la sdang ban tei ia kawei ka building hynrei la pynkut noh ia ka jingtrei.
Kila kyrpad ia u Myntri Rangabh ban pykhie im biang ia katei ka kam bad ban tei pyndep noh na ka bynta ka bha ka miat jong ki nongshong shnong bad kila pynpaw ruh ha u Myntri Rangbah ia ka jingdonkam ban don sa uwei u Transformer bad ka jingshna da ki tin ia ki dukan kiba don ha ka Wansing Bazar.
U Myntri Rangbah ula pynthikna ia ki paidbah ka thain ba yn sa khmih bniah ia ki jingdawa jong ki bad yn sa bei tyngka na ka Chief Minister’s Development Fund ban shna da ka tin ia ki dukan.
