Shillong, Risaw 11: Ka Meghalaya Youth League 2024 kala kut noh hynne ka sngi Thohdieng ha ka jingshongkun ha kaba ka West Jaintia District Sports Association kala long ka lahduh ha ka U-14 katba ka Shillong Sports Association kala long ka lahduh ha ka U-16 ha ka jingiakhun ia ka Final kaba la long ha SSA Stadium ha First Ground, Polo.
Ka West Jaintia DSA kala pynliem ia ka Nongstoin District Sports Association da 2-0 ha ka U-14 bad ka Shillong SA kala pynliem iaka Ri-Bhoi District Sports Association da 2-1 ha ka U-16.
Ha ka kylla step ka jingiakhun hapdeng ka West Jaintia DSA bad ka Nongstoin District Sports Association kala kut ha ka jingiakhaid ha kaba ym shim la don kiba la lah ban thep kol. Ha ka kylla miet, u Shanmiki Myrchiang ula ioh thep ia ka kol na ka bynta ka WJDSA bad hadien kane la pynskhem ia ka jingjop haba ka WJDSA kala ioh thep ia ka kol lyngba u Elvinson Lyngdoh.
Ha ka U-16 ka jingiakhun hapdeng ka Shillong Sports Association bad ka Ri-Bhoi District Sports Association kala long kaba itynnad bad ha ka kylla step, ka SSA kala ioh ia ka Penalty bad u Menangpyndap Khongjee ym shim la pynlehnoh ei ia katei ka kabu bad ula ioh ban thep ia ka kol.
Ka RBDSA kala ioh ban pyniakhaid ha ka kylla miet ha kaba u Wanplielad Marbaniang ula ioh thep ia ka kol hadien ba u nongapkol. Ka SSA kala bteng ban ialehkai bha bad u Iminstar Mawlong ula ioh ban thep ia ka kol na ka bynta ka SSA kaba la long syndon ka kol kaba la rah ia ka nam jop. Ka Ri-Bhoi kala pyrshang ban pyniakhiad hynrei kam shym la lah satia bad wat hashwa ban wai ka jingiakhun ka bol kaba la shut kala leit dei ia u dieng kol bad mih noh shabar.
Baroh ar tylli ki kynhun kiba la iohrah ia ka nam lahduh kila iohpdiang mar T.2 Lak, katba ki kynhun kiba la wan baar ne Runners-Up kila ioh mar T.1 lak.
Kane ka lympung ialehkai kadei kaba la pynlong da ka Meghalaya Football Association ha ryngkat ka jingkyrshan jongka sorkar Meghalaya.
U Kongsan ha kane ka sngi u dei u Myntri ka Tand Sports and Youth Affairs Bah Shakliar Warjri ha ka jingiadon ryngkat ki heh ki hain kynthup ia u MDC ka Mawsynram u Bah Alvin K Sawkmie, u Working President ka Meghalaya State Olympic Association u Bah John F Kharshiing.
Ha ka Final jongka U-14 ka Deputy Commissioner jongka East Khasi Hills ka Kong RM Kurbah kala long ka Kongsan ha kaba la donlang u President ka MFA u Bah Hamletson Dohling bad u General Secretary u Bah Sunesh Syiem.
Haba kren ha ka jingpynhap pyrda ia katei ka lympung iakob ialehkai u Bah Shakliar Warjri ula ai khublei ia ki spah ngut ki khynnah kiba la iashimbynta ha ka MYL na kylleng ki bynta jong ka jylla halor ka jingialehkai shitrhem ka jongki bad ula ai khublei ruh ia ki bahaiing bahasem, ki paralok parajor bad ia ki Coach.
“Ka Meghalaya Youth League ka iahap bha bad ka jingthmu jong ka sorkar jylla ban phaikhmat na ka bynta ban kyntiew ia ki nongialehkai kiba dang khynnah bad kine ki jingtrei shitom kin sa seisoh na ka bynta ka jylla ha ki snem ban wan” ong u Myntri Sorkar.
Ula pyntip ruh ha ka jingialang ba ka madan ialehkai jong ka MFA ha Third Ground kan sa ioh noh da u Artificial Turf uba thymmai ha ki bnai kiban wan.
“Ngi tip ba ka football kadei ka jingialehkai kaba ka jylla ka ieid bha ban ialehkai bad ka sorkar kala rai ban bei tyngka na ka bynta ban bujli noh ia u Artificial Turf jong ka madan MFA” ula pynbna.
Ia ka MYL la plie ha u Naitung da u Myntri Rangbah ka jylla u Conrad K Sangma bad ha katei ka por ula ong ba kane ka lympung ialehkai kan dei kaban pynkylla ia ka rukom ialehkai bad kan wanrah ia ka jingkylla kaba khraw ha kaba iadei abd ka kam ialehkai Football ha ka jylla Meghalaya.
Kila don 18 tylli ki District Association kiba la iashimbynta ha ka U-14 Championship bad 19 tylli ha ka U-16. Ha ka jingpynielehkai ia ki 160 tylli ki jingiakhun kala don ka jingthep 620 kol bad kala don ruh ka jingpyni ia ka sap kaba kyrpang ha ka rukom ialehkai ki khynnah.
Ha ka U-14 ia ka nam Player of the Final la ioh da u Shanmiki Myrchiang jongka WJDSA bad ula ioh ruh iaka khusnam Player of the Tournament, katba u paralok uba don lang ha kajuh ka kynhun u Kaisarmi Dkhar ula ioh ia ka khusnam Top Scorer, katba u Edyson Marbaniang jongka SSA ula ioh ia ka khusnam Best Goalkeeper.
Ha ka U-16 ia ka nam Player of the Final la ioh da u Iminstar Mawlong jongka SSA bad u paralok uba ialehkai lang bad u na ka SSA u Iaiapkyrmen Kharkongor ula ioh ia ka nam Best Goalkeeper bad u Menangpyndap Khongjee pat ula ioh ia ka nam Player of the Tournament, katba u Me-u-ba-ai Sumer jongka Ri-Bhoi ula ioh ia ka nam Top Scorer.
