Shillong, Nailar 19: U Myntri Khynnah ki kam pohiing ka Jylla Ajay Kumar Mishra hynne ka sngi thohdieng, ula ong ba ka jingiakren iasuk bad ka Hynniewtrep National Liberation Council (HNLC) kala iaid shakhmat.
“Mynta ka jingiakren ka dang iaid shakhmat (bad ka HNLC) bad hadien bala kut, ngin sa pyntip ia kaei ka rai” ong u Mishra haba iakren bad u nongthoh khubor.
Ula pynkynmaw ba ka don ka por ba ki kynhun nabar ri kila pynshlur ia ki kam kaikhlaw bad ki don ruh bun ki briew napoh ka Ri ki bym kwah satia ba ka Ri kan kiew shaphrang ha ka roi ka par.
U Myntri u ong ba ha kine ki phra snem naduh ba shimti u Myntri Rangbah Duh Narendra Modi bad u Myntri kam Pohiing Amit Shah ban ialam ia ka Ri, ka sorkar kala shim ia ki sienjam ha kaban pynbeit ia ki jingeh kiba iadei bad ki kam kaikhlaw lyngba ki jingiakren iasuk.
“Namar kata, ha kiba bun ki jaka, ngi la lah ban tehlakam ia ka kam kaikhlaw. Ha ka jingshisha, ki don ruh bun ki jaka ha ka Ri ba ka jinglong jingman kam long satia kaba suk kaba sain. Hynrei hapdeng kiei kiei kiei, ka jingsuk mynta kala wan phai ha kine ki jaka” ong u Mishra.
Halor ka jingdawa ban pynrung ia ka Ktien Khasi bad Garo ha ka khyrnit kaba phra, u Mishra ula ong baka Sorkar Pdeng kala wanrah ia ka Education Policy ba thymmai bad u Myntri Rangbah Duh haba ai jingkren la ong ba ka jingpule ha ki kyrdan Primary kan sdang shuwa da la ka jong ka Ktien ka Thylliej.
