Shillong, Nailar 19: U Myntri Khynnah ki kam pohiing ka ri u Ajay Kumar Mishra hynne ka sngi thohdieng ula pyntip baka Sorkar Pdeng ka dang wad ia ki lad ki lynti halor ka jingdawa pyntreikam ia ka Inner Line Permit (ILP) ha Meghalaya.
“Kat kiba don ki jingeh kiba mih, ngi dang pyrshang ban wad ia ka lad ka lynti ban pynbeit noh shen. Ha kine ki phra snem, ngi la trei shitom bad kaei kaba dang sah, ngin sa pyndep noh shen” ong u Mishra haba iakren bad ki nongthoh khubor.
Ha u snem 2019, ka Iingdorbar Thaw Ain ka Jylla kala mynjur ia ka Resolution ba dawa ia ka Sorkar Pdeng ban pyntreikam noh mardor ia ka ILP ha Meghalaya. Hynrei, ki kynhun iakhih pyrshah mynder, kila pynpaw ia ka jingbym sngewtynnad halor ka jingpynslem jong ka Sorkar pdeng ban kren da kaba shai halor ka Resolution ka Jylla.
Haba twad jingmut na u halor kane, u Myntri Khynnah ula ong ba kam pat long ban iathuh eiei shaphang kane namar kane ka kam ka dang don ha ka jingbishar jong ka sorkar Pdeng.
“Peit haba ki kam ki dang iaid lane haba ki kam ki dang don hapoh ka jingbishar lane haba don ki jingdawa, kam long kaba dei ban iathuh eiei ia kine ki kam. Dei tad haba la don ki plan ne la mynjur ia ki Policy ba ngin sa lah ban pynbna” ula ong.
