Shillong, Risaw 02 : Ha ka jingrakhe ia ka Swachh Bharat Diwas, u Myntri Rangbah Duh ka Ri Narendra Modi ula plie paidbah ia bun tylli ki project ba kongsan ha kylleng ka Ri kynthup ia ka Faecal Sludge Treatment Plant kaba don ha Bomfyle Road, Shillong.
Ia kane ka project la pyntrei da ka Shillong Municipal Board (SMB) hapoh ka AMRUT bad ka pyni ruh ia ka jingkiew kaba khraw ha ka jingkhuid jingsuba jong ka nongbah bad ki jingtei ban pynkhuid ia ki jaboh.
Kane ka jingplie paidbah kala hap ruh ha ka sngi rakhe ïa ka lyngkhuh sngi kha kaba 155 snem jong u Mahatma Gandhi, kaba pynpaw ïa ka mynsiem jong ka Swachh Bharat bad ki sienjam ban wanrah ia ka khuid ka suba.
Ka SMB kala pynlong ruh ia ka jingialang ha ka jaka ba tei ia ka Faecal Sludge Treatment Plant bad la pyni ruh lyngba ki dur ba im bad ba khih ia ka jingkren jong u Myntri Rangbah Duh ka Ri. Ka Myntri ka Koit ka Khiah Dr M Ampareen Lyngdoh kala iashimbynta ha kane ka jingialang kum ka nongshah khot sngewbha ba kyrpang.
Kane ka Plant kaba dang shu plie thymmai ka pyndonkam da ki tiar ka juk ba mynta ban pynkhuid ia ki painkhana bad ki um jakhlia na ki septic tank bad ki thliew painkhana.
La khmih lynti ba kane ka plant kan ai jingshakri ia kumba 1 lak tylli ki Longiing bad ka lah ban pynkhuid haduh 350 kilo leter ka jaboh bad ka umjakhlia manla ka sngi.
Nalor kane, ha kane ka sngi la ai jingithuh ruh ia ka jingshakri jong ki Nongtrei ka SMB ha kaban pynlong ia ka nongbah kaba khuid. Kum ka jingburom ia ki, ka National Insurance Company Limited, kala pynkup burom ia ki da ka Insurance bala tip ka Janata Personal Accident Policy kaba shongdor haduh T. 2 lak marwei.
