Agartala, Nailar 19 : Ka tnat pulit ka Tripura ka la thaw ia ka kynhun ka ba kyrpang ban pynlong ka jingtohkit halor ka jingpulom ha ka liang ki bor pahara hapoh ka headquarter jong ki pulit hadien ka jingshah tuh ki file na kane ka jaka ha kine ki khyndiat sngi ba la dep.
Haba pynpaw lyngba ka jingthoh, na ka liang ka tnat pulit ka la ong, “Ha ka miet jong ka 15-16 tarik mynta u bnai, katto katne song ki file ia kiba la thmu ban weng noh bad pynsniew noh nalor katto katne ki file ki ba la rim kiba don hapoh ka synduk jong kane ka headquarter ki la shah tuh noh bad shah pynjulor ha ki riew runar. Halor kane ka jingjia la rejistar case mardor hapoh West Agartala Police Station.
Katei ka jingthoh ka la ong ruh, “Ia baroh ki file la ioh pat hadien ka jingshimkhia mardor jong ki pulit hapoh ki khyndiat kynta hadien jong katei ka jingjia.San ngut ki briew kila shah kem noh halor kane ka jingjia.
Hadien ba la pynlong ia ka jingtohkit halor kane ka jingjia, la shem ba kane ka lah ban dei ka jingdonkti jong ki briew kiba kyrni ha u drok.Halor kane ka jingjia la hukum ruh ban pynlong ia ka jingtohkit ha u heh pulit kumjuh ha ka ba iadei bad ka jingpulom ha ka liang ki bor pahara.
Halor kane ka jingjia la kem noh ia san ngut ki briew kiba donkti, ong u heh pulit ka Agartala police station u Subrata Chakraborty.Watla katta u heh pulit ula ong ba kim pat lah ban tip thikna ia ka daw bad ka jingthmu kaba sha lyndet halor kane ka jingjia.
Ha kawei pat ka bynta, na ka liang u nongialam ka liang pyrshah Congress, u Sudip Roy Barman ula dawa ban pynlong ia ka jingtohkit lyngba u nongbishar ka iingbishar High Court halor kane ka jingjia ka bym ju kham jia koit.Na ka liang ka CPI-M ruh ka la dawa da ka jingtohkit ka ba kyrpang halor kane ka jingjia.
