Ithuh ka Sorkar ia ki jingeh kiba long diengpyngkiang ia ka roi ka par jong ka Jylla
Shillong, Nailur 30 : U Myntri Rangbah ka Jylla Conrad K Sangma ha ka sngi Nyngkong, ula batai ia ki jingthmu bad ki sienjam ba ka Sorkar Jylla kala shim ban kyntiew ia ka roi ka par ka Jylla bad pyntip ba kala dep ithuh ia ki jingeh, kiba long ki diengpyngkiang ha ka jingiaid lynti jong ka Jylla.
“Ngi la ithuh ia ki jingeh bad ngi la shem ia ka lynti ban weng ia kine ki jingeh kiba ktah ia ka roi ka par ha ki kam bapher bapher hapoh ka Jylla” ong u Myntri Rangbah haba kren ha ka jingialang jong ka 16th Finance Commission ba long ha nongbah Shillong.
Haba pynpaw ba kane ka Sorkar ba mynta kala hap shimti ia kiba bun ki jingtynjuh jong ki snem bala leit noh, ula ong “Ha kiba bun ki kam, ngim shym la lah ban lehbha, khamtam ha ka koit ka khiah bad ka pule ka dangle, ngi la shimkhia ia kane bad dep ithuh ia ki jingeh bad mynta ngi dang ialeh ban weng ia kine ki jingeh ha ka lynti kaba dei”.
Haba ai nuksa ia ka jingiap ki longkmie ba kha khun (Maternal Mortality Rate), kaba la long arshah ia ka national average ha u 2018, u Conrad ula ong “Ngi la wanrah ia ka prokram MOTHER ha kaba lyngba kane ka prokram ngi la wad jingtip ia ki longkmie ba armet kiba don ha ka jingma bad wanrah ruh ia ka prokram ban ai jingsumar bad ban pynkha khun ha ki jaka sumar”.
Haba buh mawnongrim ia ka roi ka par, u Myntri Rangbah ula ong ba lyngba ka 16th Finance Commission, ka Sorkar kala ioh ia ka song ba T.3000 klur bad lyngba ka Externally Aided Project (EAP), ka Jylla kala lah ban pynioh ia ka song pisa ba kot kumba T.9000 klur, ban pyntreikam ia ki kam pynroi bad ki jingtei bapher bapher.
“Lyngba ki jingiatreilang bad ki International Bank, ki Institution, ki University kum ka Berkeley, ka Jylla kala lah ban kynthup ia ki paralok kiba shemphang bad ba tip ia ki kor ka juk ban iatreilag ha kaban nang lah kyntiew ia ka roi ka par ba angnud da ka Sorkar” ula ban jur.
Haba aiti ia ka dorkhas jong ka Jylla sha u Chairman ka 16th Finance Commission Dr Arvind Panagariya, u Myntri Rangbah ula kren ruh halor ka jingkongsan jong kane ka jingialang, kaba pynlah ia ka Jylla ban nang pynbteng ia ki mishon ha kaban pyntyllun shakhmat ia ka roi ka par jong ka Jylla.
“Ngi phaikhmat sha ka 16th Finance Commission ban ai jingmynjur ia ka dorkhas jong ngi bad ban kyrshan pura ia ngi ha kaban lah pynurlong ia ka thong na ka bynta ka Meghalaya” ong u Myntri Rangbah.
Ha kane ka jingialang ba neh baroh shisngi, ka 16th Finance Commission kala lum ruh ia ka jingialang bad ki nongmihkhmat na ki nongkhaii bad nongseng karkhana, ki dorbar shnong na sor bad nongkyndong lem bad ki seng sain pyrthei.
