Shillong, Nailur 27: Ka Mei-Ramew State Agroecology Cooperative Society kala plie da ka jingjop ia ka Farmers Market ne ka Ïew nongrep kaba nyngkong eh ha Ladmawphlang hynne ka sngi Thohdieng.
Kane ka jingïalang kala lumlang ïa baroh ki nongrep na ki jaidbynriew bapher bapher ha ka thaiñ, kaba la ailad ïa ki nongrep iaka rynsan ban pyninam bad ban die ia ki marrep ‘Organic’ ne kiba khlem pyndonkam ia ki dawai dashin. Katei ka iew kadei lyngba ka jingïatreilang hapdeng ka NESFAS, Cooperative Society bad ka jingiatreilang bad ki shnong ki thaw kiba kynthup ïa ka shnong Ladmawphlang, Laitsohpliah, Mawstep, Pyrda, Mawbri, Laitlyndop, Nongpriang, Nongtraw, Dewlieh, Mawmihthied bad ka Kshaid.
Ha katei ka iew la pyni bad die ia kiba bun jait marrep bad ki jingbam kiba la shna na ki jingthung jingtep kum u Sha Shiah Krot, Rosella jam, u achar Bayberry, ka jam Sohiong bad ki jingbam khlaw kum u Jatira, u Jasim bad u Jamyrdoh.
U Babu Richard Ranee, uba long u nonghikai skul ha ka shnong Nongtraw, ula banjur ïa ka jingkongsan jong kane ka sienjam bad ka pynpaw ba ka Farmers Market bad kadei kadei ka sienjam kaba kongsan ban pynkupbor ïa ki nongrep ha nongkyndong, ban kyntiew ïa ka rep ka riang bad ban ai ka rynsan kaba donkam ïa ki nongrep ban die bad pyniaid iew ïa ki mar rep ki jong ki.
Katei ka jingïalang kala khring ïa ki nongjngohkai kiba wankai na Sohra, kiba la sngewkmen ban lap ïa ki mawkordor kiba la buhrieh bad ban tip shaphang ka rep ba kyrpang jong ka thaiñ.
Ka Reema, kaba na Mumbai, kala pynpaw ia ka jingsngewtynnad ia kane ka iew nongrep bad ia ka jingnoh synniang ban pynneh pynsah ia ki rukom bam tynrai bad kala ai khublei ia ka imlang sahlang bad ia ki nongrep,
“Na ka bynta ki briew kum ma ngi, kiba wan na ka thain Sepngi jong ka ri India, kane ka long kaei kaei kaba thymmai ban iohi ia ki mar rep kiba khlem pyndonkam dawai bad kiba khuid, kiba la mih na ki shnong ki thaw kiba long lypa kiba khraw” ong ka Reema.
U MLA ka Sohra u Bah Gavin Mylliem, uba long u kongsan ha katei ka jingialang ula pynpaw ia ka jingsngewkmen ban iohi ia ki nongjngohkai ki leit barabor haki jaka dei jong ki trai ri. Ula pynpaw ka jingsngewnguh ïa ka NESFAS kaba la kyntiew ïa ki mar rep ‘Organic’ kiba la kylla long ki mar kiba kham eh bha ban ioh ha kine ki sngi, kaba ai jingmyntoi ïa ki nongrep ha nongkyndong kiba shaniah tylli ha ka rep ka riang.
Ula banjur ia ka jingdonkam ban iatreilang ban iada bad ban kyntiew ia ki rukom bam tynrai bad ban pynthikna ba kan don ka jingpyniaid beit ryntih ha kaba iadei hapdeng ka jingdawa bad jingpynbiang ia ki mar rep Organic.
U Momin uba long u Sub-Registrar ka Cooperative Society, Sohra ula pynpaw ia ka jingsngewkmen ban sakhi ïa ka jingpyni ia ki mar tynrai bapher bapher kaba pyni ia ka jingriewspah ha ka kolshor bad ula pynpaw ba ka don ka jingiasyriem hapdeng ki mar rep kiba khlem pyndonkam dawai kiba la thung da ki jaitbynriew Khasi bad Garo.
U Community Consultant ha NESFAS u Bah Shaiphar Dohling, ula ai khublei kyrpang ïa baroh ki nongwan bad ki nongïashimbynta kiba la ai ka jingkyrshan ia katei ka jingthmu.
“Ngi kyrmen ban wanrah iaka jingkylla ia ki iew nongrep bad ban pynlong ia ki ban suk shuh shuh ban ioh ia ki nongrep ha ki jaka nongkyndong. Kane kadei tang ka jingsdang jong ka jingïakhih kaba heh, ban kyntiew ïa ki rukom bam tynrai”, la ong u Bah Dohling.
Katba u Babu Nestar Kharmawphlang, u Chairperson ka NESFAS, ula pynpaw ia ka jingkongsan ban pynneh pynsah ia ki jait jingim ki bapher bapher bad ban pyndonkam ia ki mar rep Organic ban iakhun pyrshah ia ka jingkylla ka suinbneng.
“Ki pateng kiba la leit noh, kila pyndonkam ia kane ka jingdon kyrhai kaba la ai da ka mariang na ka bynta ban shna ia ki dawai dashin,” ula ong bad ka bynrap “Da kaba kyrshan ia ki nongrep trai ri bad ban kyntiew ia ka rep khlem pyndonkam dawai, ngi lah ban pynduna ia ka jingshaniah jong ngi na kiba nabar bad ban noh synniang sha ka pyrthei ban long kaba koit ba khiah”.
Ka jingjop jong ka Farmers Market ha Ladmawphlang ka long ka sakhi ia ka jingnang kiew ka jingsngewtynnad ha kaban pynneh pynsah ia ki bam tynrai kiba pynmih ha ki shnong ki thaw. Katba kane ka sienjam ka nang bteng ban iar shuh shuh, ka don ka lad ban wanrah ia ka jingkylla ha ka jingim jong ki nongrep ha ka thain bad ban kyntiew ia ka rukom im kaba koit ba khiah krad.
