Shillong, Nailar 19: U nongaibuit ba hakhlieh duh ka United Democratic Party (UDP), Bah Bindo M Lanong ula kyntu ia ki Nongialam ka UDP ban pynthikna ba ka jingjied ia ki kyrtong sha ka elekshon 2023 ka dei ban long kat kum ka riti treikam jong ka party.
Ha ka shithi ba ula phah sha u President Bah Metbah Lyngdoh bad General Secretary Bah Jemino Mawthoh, u Bah Bindo ula ong ba ka long kaba donkam ban pynbeit ia ka rai ban jied kyrtong da ka core commitee namar ka long kaba iaid pyrshah ia ka riti treikam ka party.
“Ki District ki dei ban phah ia ki kyrteng jong ki kyrtong kat kum ka riti treikam bad kumba ju leh bad lada don ka jingbym sngewhun ia ka jingleh ka District, ka State Election Committee ka dei ban pynbeit ia kane” ula ong.
U Bah Bindo ula pyntip ruh ba bun kila pynpaw ia ka jingsngewkhia halor ka rukom jied kyrtong mynta naba kam don satia ka jingsngap lang ia ki nongialam ka party ha kiba bun ki district haba iadei bad kane ka bynta.
“Kane ka jingleh ki nongialam ka party khlem pep kan sa ktah ia ka party namar la pyntip sha nga da ki nongialam na Jaintia bad Ri-Bhoi bad kiwei kiwei ki District ba phi la noh pynban sha kito ki bym dei na ka party tang namar ba ki dei ki heh spah” ula ong.
“Ngam lah ban tip ba haduh katno ka pisa jong ki ka lah ban pynjop ia ki ha ka elekshon lane la ki don ka jingmut ban pynkhlain ia ka party” ula ong.
