Shillong Nailur 25: Ka Hynniewtrep Integrated Territorial Organisation (HITO) Ranikor Circle hynne ka sngi Balang, ka la iakynduh ia ka Myntri ka tnad ka koit ka khiah Dr Ampareen Lyngdoh bad dawa kyntiew kyrdan noh ia ka Mawpud Sub-Centre sha ka Primary Health Centre (PHC).
Haba kren sha ki lad pathai khubor, u Secretary ka HITO Ranikor Circle Bah Arthur Thongni u la iathuh ba naduh 2014, ki nong shong shnong ka shnong Mawpud, South West Khasi Hills lem bad kiwei ki shnong marjan, kila dawa ban kyntiew kyrdan iaka Sub-Centre sha ka Primary Health Centre (PHC).
Ula iathuh baka Mawpud Sub-Centre ka ai jingshakri ia palat 17 tylli ki shnong bad namar kane, ki paidbah ka thain ki kwah baka Sorkar Jylla ka dei ban kyntiew kyrdan noh ia kane ka jaka sumar.
“Ngi la pynpaw ka jingsngewkhia haka Myntri ka tnat ka koit ka khiah namar ka jingbym don ka jaka sumar kaba biang lane ka PHC ha katei ka thain bad kane ka la buh jingeh ia ki paidbah wat haduh ba bun ki briew ki la duh ia ka mynsiem namar ka jingbym ioh ia ka jingsumar kaba paka. Namar kata ngi la kyrpad iaka Myntri ban kyntiew noh kham kloi ia ka Mawpud Sub-Centre sha ka PHC” ong u Bah Arthur.
Haba kylli, u Bah Arthur u la ong ba naka liang ka Myntri ka khlem ai kano kano ka jingkular hynrei kala kular pat ba kan sa pyntip shaka seng halor kane ka jingdawa.
){kind=link}