Shillong, Nailar 18: Ka Sorkar Jylla hynne ka sngi palei, kala rai ban sdang ai challan biang noh haba iadei bad ka jingkhaii ia u mawshun shabar ka Jylla Meghalaya.
Kane ka rai kala mih hadien ba ka Sorkar kala ioh ia ka jingpynshai na ka Ministry of Coal and Mines bad Ministry of Commerce halor kane ka kam, kaba mih ruh na ka hukum jong ka Iingkashari Meghalaya High Court ba 23 tarik Jylliew 2023.
Thank Hon’ble Union Minister for Coal & Mines, Sh. @JoshiPralhad Ji & Hon’ble Union Minister for Commerce & Industries, Sh. @PiyushGoyal Ji for facilitating issuance of notification clarifying on export of limestone from Meghalaya. pic.twitter.com/b7bFJmnF0z
— Conrad Sangma (@SangmaConrad) August 18, 2022
Kane ka jingpynbna kala mih hadien ba u Myntri Rangbah ka Jylla Conrad Kongkal Sangma ula tuklar ia kane ka kam bad dang shen ula iakynduh ia u Myntri ka Ministry of Commerce u Piyush Goyal bad ruh ia u Myntri ka Ministry of Coal & Mines u Pralhad Joshi ha Delhi.
Haba iakren bad ki nongthoh khubor, u Symbud Myntri Rangbah ka Jylla Bah Prestone Tynsong ula ong haba khatduh, mar syn ioh pdiang ia ka hukum ka Iingkashari, ka Sorkar Jylla kala iakren ia kane ka kam bad ka Sorkar India, ka Ministry of Coal and Mines bad ruh ka Ministry of Commerce.
“Dang ha kine ki khyndiat sngi, ngi la ioh ia ki jingai jingmut, ka jingpynbna paidbah bad ka jingpynshai na kine ki artylli ki artylli ki Ministry. Kila pynshai ba ka jingkhaii ia u mawshun ka dei kaba la buh ha ka thup jong ki mar khaii kampher la u mawshun u dei uba la ithuh kum u Major lane Minor mineral” ula ong.
U Bah Prestone ula pyntip ba ka Sorkar Jylla lyngba u Advocate General kala ioh ruh ban pdiang ia ka jingaiktien ia ki jingsngew jong ka Iingkashari.
Ka Iingkashari haba shong bishar biang ia ka mukotduma bala mudui da u Bah lawyerson War hynne ka sngi palei kala ong “Naba u nongmudui ula pan por, ai ba ia kane ka kam yn bishar hadien artaiew. Buh ba ka jingshong bishar kan long ha ka 7 tarik Nailur 2022”.
Halor kane, u Symbud Myntri Rangbah ula pynbna ba ka Sorkar kala rai ban sdang ai challan biang ha kaban khaii ia u mawshun shabr ka Jylla Meghalaya.
“Mynta ka sngi, lyngba u Advocate General, ngi la ioh ia ka jingaiktien jong ka Iingkashari ba naduh mynta ngi la lah ban ai challan biang ban khaii ia u mawshun kampher la u dei u major ne minor mineral bad ka Sorkar Jylla kan sa ai challan noh sha ki nongkhaii ba kin khaii ia une u mar shabar ka Jylla bad ka Ri ruh kumjuh” ula ong.
Haba kylli, u Bah Prestone ula iathuh ba ka Sorkar kala sangeh ban ai challan khaii mawshun naduh ka 23 tarik Jylliew 2020.
