Shillong, Sep 18: Ka Meghalaya Football Association hynne ka sngi Balang kala pynkup burom ia ka Kong Ri-iohlang Dhar halor ka jingshah jied ka jongka ban long ka Assistant Referee ha ka FIFA U-17 Women’s World Cup, kaban long ha u bnai ban wan.
U President ka MFA u Bah Hamletson Dohling bad u General Secretary ka MFA u Bah Sunesh Syiem kila aiti da ka song tyngka ia ka Kong Dhar kum ka dak jong ka jingai mynsiem halor ka jingshah jiedbad jingioh jingithuh ka jongka bad ia kane ka jingpynkup burom la leh hadien ba la wai ka jingialang jongka Executive Committee kaba la long ha ka ophis treikam ka MFA ha JN Stadium, Polo.
U Bah Hamletson ula pong ba ka Kong Dhar kala long ka nongai mynsiem ia ki samla ka jylla Meghalaya bad kadei ka baar hapoh ka ri India ban ioh ban long kum ka nongbishar ne Assistant Refree ha ka World Cup.
Ka Kong Dhar kala ai khublei ia ka MFA kaba la ieng bad ai jingkyrshan ia ka ha ka lynti iaid ka jongka ban long kum ka nongbishar ha ka International-Level Football.
Ka FIFA U-17 Women’s World Cup kan long ha Dominican Republic naduh ka 16 tarik u Risaw haduh ka 3 tarik u Naiwieng.
Na ka liang u Bah Sunesh Syiem ula pyntip ba Meghalaya State League kaba saw kan sdang naduh ka 26 tarik u Risaw.
Mynta ka samoi ki kynhun ialehkai kiba tbit na kylleng ki district kiba don hapoh ka jingkhmih jongka MFA yn sa phiah ha ki 6 tylli ki Group kaban kynthup ia ki 4 tylli ki kynhun kiban ialehkai ia ka Round Robin ha ki 6 tylli ki madan ialehkai ia kaba yn sa pynbna kham hadien ia ki jingtip kiba bniah.
Ka Rangdajied United FC kadei ka lahduh haka samoi ialehkai kaba la dep da kaba pynrem ia ka Khliehmawlieh Youth Club ha ka final jongka MSL.
Nalor kane, ula iathuh ruh ba ka group stage jong ka Meghalaya Youth League naka bynta ka U-14 bad U-16 Boys kan kut ha ka 28 tarik u Nailur. Ka Quarterfinal kan sdang ha ka taiew banyngkong jong u Risaw bad hadien kane yn sa pynlong sa iaka Semifinal bad ka Final ha ka 11 tarik u Risaw bad baroh kitei ki jingiakhun kin long ha nongbah Shillong.
Ia kitei ki jingialehkai la kyrshan da ka sorkar Meghalaya.
