Shillong, Nailur 17:Ban pynkhlain ia ka jingtreimon sngewbha bad ka jingiatreilang na ka bynta ban wanrah ia ka jingkhuid jingsuba bad ha kajuh ka por ban rakhe ia ka jingdap shi snem jong ka Swachh Bharat Mission, ka Swachh Bharat Mission Gramin (SBM-G), Public Health Engineering Department (PHE) & Swachh Mission Urban ( SBM-U), ka Urban Affairs hynne ka sngi Ba-ar kala pyllait paidbah ia ka ‘Swachhata Hi Seva’ (SHS) 2024 ha nongbah Shillong.
Ia kane ka ‘Swachhata Hi Seva’ yn rakhe ha kine ki ar taiew ban wan naduh ka 17 tarik Nailur haduh ka 2 tarik Risaw halor ka phang pdeng Swabhav Swachhata – Sanskaar Swachhata.
U Symbud Myntri Rangbah ka jylla Bah Sniawbhalang Dhar uba khmih ruh ia ka Urban Affairs ula ban jur halor ka jingdonkam ban don ka jingkhuid jongka maraing bad ka jingkitkhlieh jong iwei pa iwei i nongshong shnong ban leh ïa la ka jong ka bynta ban pynthikna ïa ka khuid ka suba.
Ula pynpaw ba ka Swachh Bharat Mission, kaba la sdang da u Myntri Rangbahduh ka ri u Narendra Modi ha u snem 2014, ka dei ka prokram kaba kongsan bha, kaba donkam pat ïa ka jingïashim bynta lang jong ki paidbah ba kan long kaba jop.
Ha katei ka prokram, u Symbud Myntri Rangbah ula pynpaw ba ka tnad Urban kala dep ban bhah bun ia ka tyngka na ka bynta ban tei ia ki jingtei kynthup iaka T.15 klur ban shna pynbha ia ka lynti iaid kjat ha Iewduh bad kala tyrwa T.15 Klur na ka bynta ban pynbha ia ki iew tynrai.
Ka jingpynthymmai ia ka iew kan kynthup ban phiah ia ki basa die jhur, jakadie doh bad ki jaka die jain.
Nalor kane ula pynpaw ruh halor ka jingiohi jngai jong ka sorkar ban pynlong ia ka Meghalaya kum kawei na ki jaka jngohkai pyrthei ba pawnam jong ka India hapoh jong ka 5 snem ban wan bad ula ban jur ba kane kan urlong da ka jingdon ia ka jingkhuid jingsuba. Kane ka iahap bad ka nongrim jong ka Swachh Bharat Mission, kiba kynthup ban pynbha ha kaba iadei bad ka koit ka khiah, ka jingshngain, ka burom bad ka jingioh jingmyntoi ha ka ioh ka kot da ki nongshong shnong.
Katba ka Deputy Commissioner jongka East Khasi Hills ka Kong R. M Kurbah, kala pynpaw ba kum ki nongshong shnong kadei ka kamram ka jong ki ban bam smai ha ka ban pynthikna ban pynneh ia ka jingkhuid jingsuba bad ban leh ia kei kaei kaba lah na ka bynta ka ri.
Ka Kong Kurbah kala pyntip ruh ba ka sorkar kala mang 70 tylli ki e-vehicles ha kaba la dep ban ioh pdiang 67 tylli bad la pyntreikam ia ki ha kaban kit iaki niut kiba mih na ki thliew iing briew.
Kum ka dak jong katei ka jingrakhe ia ka jingplie paidbah ia ka Swachhta Hi Seva (SHS) 2024, la pynlong ruh ia ka jingbamsmai ia ka Swachhata hynne ka sngi.
