Lakhimpur, Nailar 18 :Ka Asom Jatiyatabadi Yuba Chatra Parishad (AJYCP) ka pyrshah jur ia ka jingshim rai ka kynhun myntri na ka bynta ban hikai da ka ktien english ha ka sobjek Science bad Mathematics ha ka jaka jong ka ktien Assamese lane kiwei pat ki ktien jong ka thain hapoh ki skul sorkar.
Na ka liang ka Seng ka la dawa na ka sorkar jylla ba ka dei ban pynkylla mardor ia kane ka rai.Shi bynta ban aijingkyrsyhan halor kane ka jingdawa, na ka liang ka Lakhimpur district unit jong ka AJYCP kala mih sha ki surok ban pynlong ia ka jingiakhih shong kyllain mungor ka ba lai kynta hapoh ka sor rit ka North Lakhimpur hynnin ka sngi Balang.
Lah ban kdew, ba ka kynhun myntri ha ka 28 tarik u Naitung ba la dep ka la shim ia ki rai ki ba kongsan ha ka ba iadei bad ka tnat pule puthi kaba kynthup halor ka jingpdiang lang ia baroh ki kynthei bad ki shynrang hapoh ki skul, kata lait noh tang kito ki skul jong ki kynthei ki ba la rim bha, ban bujli ia ka Social Studies bad ka Histori bad Geography kum ki compulsory sobjek.Nalor kata ka kynhun myntri ka la shim sa kawei pat ka rai ka ba kongsan, kata ba naduh ka snem 2023, ia ka sobjek Mathematics bad Science yn hikai noh ha ka ktien english naduh ka klass III shaneng ha baroh ki skul sorkar bad ki skul ki ba ioh jingiarap na ka sorkar, ia baroh ki kot jong kine ki sobjek yn print ha ka ktien English.
Kane ka jingshim rai jong ka sorkar jylla ka la wanrah ruh ka jingpyrshah na ki kynhun ki nongthoh kot, ki seng samla pule bad katto katne ki party sain hima.Na ka liang ka Lakhimpur district unit jong ka AJYCP ka la pynpaw ba katei ka jingshim rai jong ka sorkar Assam ka long ka bym iahap, ka bym khmih lynti bad ka ba dei ban pynrem jur.
Ha ba pynpaw pyrshah ia katei ka jingshim rai na ka liang ka seng ka la ong ba kaneka sienjam bala shim da ka sorkar kan ka buh ka jingma ka ba khraw halor ka jingpyndonkam ia ka ktien Assamese hapoh ki skul ha ka jylla.
“Kan buh ka jingma ka ba khraw ia ka ktien Assamese kumjuh,” ong ka Seng. “Ha ki snem ki ba la leit noh, ka sorkar Assam abd u Myntri Rangbahduh (PM) Narendra Modi ki la pynbna ba ha Assam wat ia ki kot ki ba iadei bad ki jingpule medical bad enjiniar ruh yn pynmih ha ka ktien Assamese.Ka jingsngewkhia ka ba jur ka long ka long ba ha ki jingpynbna ki ba hashwa da ka sorkar jylla bad u PM Modi bad ka jingshim rai da kane ka sorkar ba mynta ka iapher kawei na kawei pat,” ong ka jingthoh ba la pyllait da ka Lakhimpur district unit jong ka AJYCP.
Kumta ruh na ka liang ka Seng ka pynrem jur ia kane jingshim rai bym shongnia jong ka sorkar jylla bad halor ka jinglong pyrshah ia ka ktien Assamese.Shuh shuh da ka ba pynlong ia ki prokram jingiakhih, ka seng ka la dawa na ka sorkar ba ka dei ban weng noh mardor ia kane ka rai, kumjuh ban thung nonghikai ha man la ki klas jong ki skul ha baroh ka jylla, ban khmih halor ka jingbiang jong ki iingskul, ban kyntiew ha ka jingpule ka ba iadei bad ka Science bad ruh ban pyllait na ka jingsiew ha baroh ki skul sorkar.
