Rakhe ka Jylla ia ka sngi ki Nonghikai ba 63 ha kylleng ki jaka
Shillong, Nailur 05 : U Myntri Rangbah ka Jylla Conrad K Sangma, ha ka sngi Palei, ula pyllait paidbah ia ka Chief Minister’s Initiative to Maximize Pass Achievement and Classroom Triumph (CM-IMPACT), ban kyrshan ia ki khynnah skul, ki nonghikai bad ki skul ba kin lah ban ioh ia ka result kaba bha ha ka eksam Secondary School Leaving Certificate (SSLC).
U Myntri Rangbah ula pyllait ia kane ka prokram CM-IMPACT ha ka jingialang rakhe ia ka sngi ki Nonghikai (Teacher’s Day) ba 63, kaba long hynne ka sngi ha U Soso Tham Auditorium, Shillong, ha ka jingiadonlang u Myntri ka pule puthi Rakkam A Sangma bad kiwei kiwei.
Ka jingthmu ba hakhmat eh jong ka CM-IMPACT ka dei ban iakhun ia ka jingduna palat ka percentage ha ka jingpass jong ki khynnah skul ia ka eksam SSLC.
Ki bynta ba kongsan jong ka CM IMPACT ka kynthup ia ka jingsam ei ia ki guidebook ia ki khynnah skul, ka professional development support (jingai jinghikai) ia ki Nonghikai, ki additional guidebook ia ki nonghikai, ban ai jingiarap ia ki skul kiba duna duh kiba pass, ka jingpyniadon bynta ki Kmie Kpa bad ka jingpeit bniah ha ki kyrdan ki District.
Kum shibynta jong ka prokram, yn sam ei ia ki guidebook sha baroh ki nonghikai jong ki klas 10 kam pher la ki dei na ki skul shimet ne ki skul Sorkar.
U Myntri Rangbah bad ki kynrem ki lyndan kila pyllait paidbah ruh ia ka Curio Bee’s Learning Box, , ka Tiar hikai (Teaching Learning Material) ban pynroi ïa ki sap hikai ban nang thoh nang pule bad khein jingkhein (Foundational Literacy bad Numeracy ) na ka bynta ki klas Nursery haduh 3, kiba ha ka rta naduh 3-9 snem bad la pyllait ruh ïa ka Science Discovery Kit, kaba long ka Experiential Science Kit na ka bynta ki khynnah kiba shna jingshna hi naduh klas 6 haduh 8. Ha kane ka sngi la pyllait ruh ia ki kot lyngkdop jong ka SSA/DERT bad u PM POSHAN.
Haba ai jingkren haka jingialang, u Myntri Rangbah ka jylla haba pynpaw ia ka jingsngewnguh bad ka jingburom ia ki nonghikai ka jylla u la ong, “Ngi don hangne ban burom ia phi bad ai khublei ia ka jingaiti ba khraw jong phi, ka jingaiti bad ka jingnoh synniang kaba khraw kaba phi ai ban pynthikna ba ka lawei jong ka ki khun jong ngi bad ka jylla ka long kaba shngain bad kaba shai.”
U Myntri Rangbah haba sot ia ka jingkren kaba pawnam kaba pynpaw ia ka jingdonkam ban saindur ia ki briew da ka jingiohi jngai ia ka lawei, u la ong ba ka jingsaindur ia ka lawei ki briew ka dei kaba la leh da ki nonghikai kiba pynkup ia ki khynnah skul da ka jingnang jingtip bad ka jingstad. “Dei ki hajar ngut ki nonghikai ha ka jylla kiba saindur ia ka pateng ban wan jong ngi bad ia ka jingiohi jngai na ka bynta ka jylla jong ngi, bad ka sorkar kan ym shongkli kti ban kyntiew ia ka kam pule puthi baroh kawei”, u la ong.
Ha kane ka sngi, u Myntri Rangbah bad ki kynrem ki lyndan kila sam ruh ia ka State Award 2024 sha ki Nonghikai . Haduh 14 ngut ki khynnah na ki District bapher bapher kila shah pynkup burom bad ioh khusnam ha kane ka sngi.
Hapoh ka Special Award 2024, ka District Schol Education Officer ka East Khasi Hills kala ai khusnam ia ka kong Cathrene Nongrum, Assistant Teacher, Schoof & Centre for the Hearing Handicapped Children, Shillong.
La pynphuh pynphieng ia kane ka jingrakhe da ki jingrwai bad ki jingshad na ki khynnah jong ki skul bapher bapher bad kiwei kiwei ki jingpyn byrngia.
Kiwei pat kiba la ai jingkren ki kynthup ia u Chief Secretary ka Jylla Bah DP Wahlang, u Commissioner & Secretary ka Tnad Pule Puthi Vijay Kumar Mantri, u Nongaibuit ka Tnad Education Bah HM Shangpliang bad kiwei kiwei.
 ba 63, kaba long hynne ka sngi ha U Soso Tham Auditorium, Shillong, ha ka jingiadonlang u Myntri ka pule puthi Rakkam A Sangma bad kiwei kiwei.){kind=link}