Shillong, Nailur 04 : U National President ka NPP bad Myntri Rangbah ka Jylla Conrad K Sangma ula ong ba ka jingwan iasoh ba dang shen jong ki 3 ngut ki MLA ka Congress bad ka NPP ka dei ka khubor kaba shai ia ka jingshaniah ha ka Sorkar Meghalaya Democratic Alliance (MDA) bad ha ki Nongialam.
Haba iakren bad ki nongthoh khubor ha ka sngi Balang, u Conrad ula ong ba ka kynhun synrop kala don lypa jan 45 ngut ki MLA wat hashuwa ban wan iasoh ki 3 ngut ki MLA ka Congress haba bynrap “bad bun na ki paralok ba iatreilang kila aiti lut sha ka kynhun synrop bad ngi ruh ngi la aiti lut kumjuh sha ki”.
Haba pynpaw ba ka NPP kam shym la don ha ka khep ka jingsngew kutlad kumba kynnoh da ka Liang Pyrshah, u Conrad ula ong “Ha ka jingshisha, kane (jingwan iasoh ki 3 ngut ki MLA) kala nang pynkhlain ia ngi. Ngi la don ha ka khep ha kaba ka NPP kala don ia u nombor ba bun paid hynrei kumba nga ong ba kane kam mut pat ba ngin sngew sarong noh. Ngi dei kiba sngewrit. Nga kmen bha da ka jingwan iasoh kine ki nongialam. Kane ka dei ka khubor kaba shai ia ka jingshaniah ha kane ka Sorkar bad ha ki Nongialam bad ka khubor kaba shai ba ki shaniah ha ka NPP”.
Une u Khliehduh ka NPP ula kynthoh ia kane halor ka jingkren dang shen jong u Nongialam ka TMC bad Myntri Rangbah barim ka Jylla Mukul Sangma ba don ka kynrum kynram hapoh ka sem jong ka NPP bad kiei kiei baroh kin sa paw pyrthei ha ki sngi ban sa wan. Kat kum ka jingong jong u, ka NPP kala shim ia ka lynti ban thied ia ki MLA jong kiwei ki seng sain pyrthei namar ba kam shaniah shuh iala ki jong ki MLA.
Hynrei u Conrad ula ong ba ki jingkren u Mukul ka pyni pynban ba dei ma u, uba sngew kutlad bad ula pyrshang ban wanrah ia ka jingsngew skhem hala ki jong ki briew bad ka party lajong.
