Udalguri, Nailar 17: Ha kawei ka jingjia ka ba sngewtriem kumba laingut ki dkhot ka longiing ka ba kynthup ia u khynnah rit ki la shah pyniap da ka ba shah kyrdem ha ka kynhun ki hati khlaw hynne ka step sngi Balang.
Katkum ki khubor la ong ba kane ka jingjia ka la jia ha ki bynta jong ka Majbat ka ba hap hapoh Udalguri district, ha khappud ka Assam bad ka Arunachal Pradesh.Ia kine ki lanot la tip kyrteng kum u Naveen Boro (57), ka Yamini Boro (37), bad u Hadansha Boro.
Kane ka jingjia ka la wan jia hadien ba ka kynhun ki hati khlaw ki ba la wan mih na ka jaka khlaw ban wad bam ki la thombor ia katei ka longiing katba ki dang ioh thiah lyngngai ha la iing.
Ha kawei pat ka bynta, na ka liang ka Majbat committee jong ka All Bodo Students’ Union (ABSU) katei ka thain ka la pynpaw ka jingsngewlem halor kane ka jingjia bad kyntu ruh ia ka sorkar ba kan shim ka jingkitkhlieh na ka bynta iwei i khunlung i ba la tip kyrteng kum u Nijaro Boro i ba la lait im na katei ka jingshah thombor.
Kham hashwa, dang ha kane ka sngi Nyngkong ba la lah, laingut ki briew ka ba kynthup ia iwei i khunlung ki la duh ei ia la ka jingim na ka jingshah thombor ha uwei u hati hapoh Goalpara district ka Assam.
Katkum ka khubor la iathuh ba kane ka jingjia ka la jia hapoh ka shnong Kurang hajan Lakhimpur ha khappud ka Assam-Meghalaya.
Shuh shuh ki khubor ki iathuh ruh ba katkum ka jingpynpaw da ki trai shnong, la ong ba kine ki hati khlaw ki ju wan sha ki jaka jong ki bad pynjulor ia ki jingdon jingem baroh.
