Shillong, Nailar 17 : U Myntri ka tnad C&RD Bah Hamletson Dohling u la iathuh ba u la thoh da ka shithi sha u Myntri ka tnad Kampohiing ka Ri u Amit Shah ban pynkynmaw halor ka mat dawa ILP ha ka jylla bad ruh halor ka jingdawa pynrung ia ka Ktien Khasi bad Garo ha ka Khyrnit ba Phra.
“Kum u nongialam ba rim ka KSU nga la shimkhia ia kane ka kam namar ngam lah ban shu sngap kumto bad nga sngew ba kadei ka kamram jongnga ban leh ei ei khnang ba ka sorkar India kan ai ka jingtip kaba shai ia ngi la ka long ne ym long,” ong u Myntri haba kren bad ki lad pathai khubor.
Shuh shuh u la iathuh ruh ba ha katei ka shithi ba u thoh sha u Amit Shah ha ka 25tarik u Naitung, u la kyrpad ia ka sorkar Pdeng ba kan pyntreikam noh mardor ia ka ILP bad ruh ia ka Ktien Khasi bad Garo ha kane ka jylla.
“Haduh mynta naduh ba nga thoh ngam pat ioh kano kano ka jingai ktien lane ka jingpyntip bad haduh mynta nga dang ap ia ka jubab halor katei ka jingthoh kaba nga ai,” u la ong.
Katkum ka jingong jong u, lada shu ia kren kumto khlem da pynkynmaw biang lane khlem ka jingthoh ka ka kan shu sah noh ha lyer. Kumta u ong ba katei ka sienjam ba u shim ka long ban shai la ka sorkar pdeng ka ai ne kam ai ruh kan dei da ka jingthoh.
