Shillong, Nailar 30: Ka Ministry of External Affairs ka Ri India bad ka Ministry of Foreign Affairs ka Bangladesh, kila dep pynbeit lut nadong hadong ban pyndep ia ka jingaiti noh ia ka metiap u nongialam ka Awami League Ishaque Ali Khan Panna sha ri Bangladesh.
Ia kane ka metiap une u Nongialam ka Bangladesh yn aiti noh sha ki bahaiing hasem lashai ka sngi saitjain ha Khliehriat.
Baroh ki kot ki slab a donkam, la dep ban pyndep lut ha ka Police Headquarter ka East Jaintia Hills bad ka Ophis u Deputy Commissioner hynne ka sngi Thohdieng. Hynrei namar bala kem dum ka bneng, ia ka metiap yn sa rah noh lashai ha ka por mynstep sha Bangladesh.
Ka Sorkar Jylla kala iatreilang bad ka High Commission ka Bangladesh kat kum ka jingbthah jong ka Ministry of External Affairs bad ka Ministry of Home Affairs ka Ri.
Ki briew ba iajan bad ki bahaiing u Panna kila don ha Meghalaya ban shimti ia ka met bad ban rah ia ka sha Pirojpur District ha Bangladesh. Ka High Commission ka Bangladesh kala buh ia u briew ban pynithuh ia ka met bad ban pyndep lut ia ki kot ki sla kiba donkam.
Kat kum ka khubor, ia ka metiap jong u Panna yn sa pynkit da ka kali lyngba ka Dawki Land Port bad ki shipai BSF bad BGB kin ia iapynbeit ia ki jingdonkam baroh khnang ba kan nym mih kano kano ka jingeh haba jam ia u pud u sam.
Ka khubor ka pyntip ba ia metiap yn sa aiti ha ka por 5 baje mynstep na Khliehriat Civil Hospital. Kat kum ka kaiphod post mortem, u Panna ula shah pyniap da ka jingksih.
Lah ban kdew, ia ka metiap u Panna kaba la kem pyut la lap ha ka 26 tarik Nailar na kawei ka bri kwai kaba don ha Dona Bhoi, East Jaintia Hills, kaba jngai kumba 1.5 km na khappud ka Bangladesh.
