Shillong, Nailar 30 : Ka Sorkar Jylla ka dang ap ia ka jingbthah na ka Sorkar Pdeng ia ka sienjam ba ka dei ban shim halor ka jinglap ia ka metiap u Nongialam sain pyrthei ka Bangladesh na ka thain Dona Bhoi, East Jaintia Hills District, kaba jngai kumba 1.5 km na khappud Indo-Bangladesh.
Ia ka metiap une u Nongialam ka Bangladesh la lap ha ka janmiet 26 tarik Nailar bad la ithuh ia u lyngba ka passport ba u kyrteng u Ishaque Ali Khan Panna, uba bat kum u General Secretary barim ka Bangladesh Chhatra League (BCL) bad u dkhot ba hakhmat ka Awami League ba na Pirojpur District.
Ia ka metiap jong u la buh ha ka jaka buh metiap ka Khliehriat Civil Hospital ban wan pynithuh bad kami a ka met.
Haba pyntip ia kane hynne ka sngi Thohdieng, u Symbud Myntri Rangbah ba khmih ia ka kam Pohiing (Police) Bah Prestone Tynsong ula ong “Ngi la pyntip sha ki bor ba halor bad sha ka High Commission ka Bangladesh ha India (halor ka jinglap ia ka metiap) bad mynta ngi dang ap ia ka Home Ministry ban bthah ia kaei kaba ngi dei ban leh”.
Ula pyntip ruh ba ka Sorkar kala bthah ban pynlong ia ka forensic test ban tip kumno kane ka jingjia kala jia.
U Bah Prestone u pyntip ba ki bahaiing u Panna kila dep pynithuh ia ka metiap bad kila don ha lynti ban wan shane.
“Kumba nga ong, ka Ministry of External Affairs bad ka Ministry of Home Affairs kila shimkhia ia kiei kiei baroh bad ka kamram jong ngi kum ka Sorkar Jylla ka long tang ban aiti ia ka metiap sha ki bahaiing hasem shisien ba kila wan poi ha Meghalaya (India)” ula ong.
U Symbud Myntri Rangbah ula ong ruh ba kat kum ki jingtip bala ioh na ki BSF, kam shym la don satia kano kano ka jingpyrshang ban wan rung tuh sha India da une u Nongialam bala iap ka Bangladesh.
“Namar na Bangladesh kila kam ba une u Nongialam ka Awami Leaque ula pyrshang ban wan phet sha India bad ula don ha lynti hynrei ki BSF kila pynshisha ba kam long satia kumta hynrei hadien 2-3 sngi la lap noh ia ka metiap jong u na khappud ka India” ula ong haba pyntip b aka kaiphod post mortem ka pyni ba u Panna ula shah pyniap. “Namar kane, ka kam ba ka Sorkar kan leh ka long ba ngin nang pynlong ia ka jingtohkit bad kane ka dei ka forensic test” ula bynrap.
Nalor kane, u Bah Prestone ula ong ba watla ka khubor kala kynnoh ba une u Nongialam ka Bangladesh ula rah shibun ka pisa hynrei kat kum ka jinglap ki Pulit bad BSF na ka metiap, kim shym la lap eiei ruh em.
Haba kylli, u DyCM ula kubur ba kane ka jingjia kala jia ha ka por ba ka Sorkar Jylla kala pynjari ia ka korphiw miet ha khappud ban khanglad ia ka jingrung beain ki briew na Bangladesh sha India.
Ha kajuh ka por, u DyCM ula ong ba kane ka jingjia kam dawa satia ia ka jingtohkit jong ka CBI ne kino kino ki kynhun ka Sorkar Pdeng.
 Bah Prestone Tynsong ula ong “Ngi la pyntip sha ki bor ba halor bad sha ka High Commission ka Bangladesh ha India (halor ka jinglap ia ka metiap) bad mynta ngi dang ap ia ka Home Ministry ban bthah ia kaei kaba ngi dei ban leh”.){kind=link}