Shillong, Nailar 29 : U Nongialam ka TMC bad Myntri Rangbah barim Dr Mukul Sangma ula ioh ia ka jingithuh kum u Nongialam ba thymmai ka Liang Pyrshah ha Iingdorbar Thaw Ain ka Jylla.
U MLA ba marwei ka Congress na Mylliem Bah Ronnie V Lyngdoh ula ioh ia ka jingithuh kum u Chief Whip ka Liang Pyrshah ha Iingdorbar Thaw Ain.
Ia kane ka rai jong u Lamphang ka Iingdorbar Thomas A Sangma la pyntip da u Commissioner & Secretary ka Assembly lyngba ka notification bala pynmih hynne ka sngi Palei.
Kane kala wan jia shisngi hadien ba ka TMC kaba don ha Liang Pyrshah, kala leit kam ia ka shuki Nongialam ka Liang Pyrshah da ka jingkyrshan u MLA ba marwei ka Congress.
Kane kan dei ka sien kaba ar ba u Dr Mukul ula shah thung kum u LO. Ka jingdonkam ban thung ia u LO ba thymmai kala mih hadien ba ka Congress kala don satang uwei u MLA da ka jingleit iasoh noh ki 3 ngut kiwei ki MLA sha ka NPP. Kane ka jingjia kala pynlong ia u Bah Ronnie ha ka kut lad bad ban hap ieh noh ia ka shuki LO.
