SHILLONG NAILAR 16: Ka seng Akhil Bharatiya Vidyarthi Parishad (ABVP), Meghalaya, Pynursla Unit, kala pynlong iaka Rally da kaba rah iaka lama lai rong ka ri kaba jrong haduh 100 Meter ha ka thaiñ Pynursla ban rakhe iaka jingdap 75 snem jong ka ri India.
Katkum ka kyrwoh kaba la phah da ka Kong Nibiang Sumer, State Secretary ABVP Meghalaya kala pyntip ba la sdang iaka jingiaid paidbah ban rah ia ka lama jong ka ri India, na ka Ophis treikam jong u SDO Pynursla bad la pynkut pat ia kane ka jingiaid paidbah ha Ri-War College Pynursla ia kaba la wan ban iashimbynta palat 350 ngut tam.
Ka Kong Nibiang Sumer kala pynsngewthuh iaki khynnah shaphang ka seng ABVP kaba la don la slem bad ia ki kam kiba kala trei bad ia ki prokram bapher kiba ka seng kala pynlong.
Katba ka Kong Darilin kaba dei ka dkhot jong ka Central Working Committee, ABVP kala kren shaphang ka jingioh jinglaitluid jong ka ri India da ka jingmih ki khla wait ka ri na ka jylla kiba kynthup ia u Kiang Nangbah, Tirot Sing Syiem bad u Pa Togan Sangma bad kiwei kiwei ki riewshlur.
