Guwahati, Nailar 22 : Kum ka sienjam ban iakhun pyrshah iaka University of Science and Technology, Meghalaya (USTM), u Myntri Rangbah ka Assam Himanta Biswa Sarma ha ka sngi Balang, ula aiksai ba ka Sorkar Assam kan khanglad noh ia ki samla ba pass na USTM ba kin aplai ia ki kam Sorkar ha Assam.
U Sarma ula ong ruh ba ka Sorkar kan sa thaw ia ki Rule kiba pyrrkhing ban thungkam ia ki samla pule kiba pass na ki University shimet kiba don shabar ka Jylla.
“Nga la bthah ia ka Tnad ain ban wad ia ki lad ki lynti ha kaban khang ia ki samla ba pass na USTM ba kin aplai kam Sorkar ha Assam, baka pynpaw ia ka jingartatien ia ki certificate ba ki ioh na ki Jylla bapher bapher” ong u Himanta haba iakren bad ki lad pathai khubor.
U Myntri Rangbah ka Jylla ula kyntu ruh ia ki samla pule ka Assam ba kin kiar na ka jingleit pule ha USTM haba kyrpad ia ki ba kin jied ia ki lad ban ioh pule ei ha Assam ha ka jaka ban siew ia ka jingpule ha ka University kaba don ha Meghalaya.
“Ka USTM ka pyrshang ban pyntroin ia ka Gauhati Medical College and Hospital (GMCH) da ka jingwanrah ia ka Medical College. Kila pyni ia ki nongpang thok ha ka jingwan jurip ka National Medical Council” ula ong.
U Myntri Rangbah ula ong ba ka Sorkar Jylla kala pynkhreh ban wanrah ia ka Bill ba thymmai ka ban pynleit jingmut ha ka ban ai ia ka ‘Security Clearance” sha ki kynhun kiba kwah ban seng ia ki jaka pule hapoh ka Jylla. Ka Bill ka thmu ban pynthikna ba kino kino ki seng lane kynhun kiba kwah ban seng jaka pule ha Jylla kin hap ban pynbiang ia baroh ki kyndon kiba la buh.
“Kane ka ain thymmai kan khmih bniah ia ka nongrim jong baroh ki kynhun kiba kwah ban seng jaka pule ha Assam” ong u Sarma.
“Naduh mynta, ki kynhun kiba kwah seng ia ka Nursing College, Medical College, Dental College, kin hap ban shim ia ka Security Clearance na ka Sorkar Jylla. Mynshuwa, kam ju don ka Security Clearance ha ka jingtreikam jong ngi. Kino kino kiba don jaka bad pisa, kin ioh ia ka jingbit ban seng ia ki jaka pule. Kine ki ain ki dei kiba la thaw ha ka por jong ka Sorkar Congress” ula ong.
