Shillong, Nailar 21: Ka Myntri ka tnat ka koit ka khiah ka Kong Ampareen Lyngdoh ka la pyntip ba ka World Health Organization (WHO) ka dang tohkit bniah halor ka jingpang ‘Wild Polio’ ha Meghalaya.
“Ka WHO ka dang tohkit bniah halor kane. Kane ka lah ban dei ka Wild Poloi kaba pher ba dang lap shen hapoh ka Jylla” ong ka Kong Ampareen.
Ka Kong Ampareen kala pyntip ba ka Sorkar lyngba ka tnat ka koit ka khiah kala peit pyrman bha ia ine i khynnah ba suba ngat jingpang Polio.
“Ngi la ïakren bad kiba haïing hasem jong i khynnah bad i khynnah i don hapoh ka jingpeitngor daka tnat ka koit ka khiah. Kaei kane ka Wild Polio, Ngi donkam ban pyrkhat hato ka WHO kan ai jingmut shuh shuh iaka Sorkar. Hato kan don ne em ka jingdonkam ban don ki jait dawai thymmai ban iada na kane ka jingpang thymmai? kala ong.
Lah ban kdew ba iwei khynnah na Tikrikilla West Garo Hills la lap ba don ia ki dak jingpang Poliomyelitis hadien ba la pynkit sha Goalpara Assam.
Kane ka jingsuba ngat jingpang Polio, ka pynkyndit ia baroh namar naduh 2014 la pynbna ba ka ri India ka lait na ka jingpang polio hadien ba la pynduhjait ia kane ka jingpang ha u snem 2011.
