Guwahati, Nailar 16 : Ha kawei na ki jingjia ka ba la pynher syrngiew ia ki ba bun ba lang, uwei u briew la kynnoh ba u la khrai khlieh ia uwei pat u briew u ba la kham tymmen bad iaid ryngkat ba ka khlieh jong u shapoh ka police station ha Sonitpur district ka Assam hynnin ka sngi Nyngkong.
Kane ka jingjia la iathuh ba ka la jia hapoh Doyalpur ha ki bynta ka Rangapara jong district.Katkum ki khubor la ong ba une u briew u ba la shah kynnoh donkti ha kane ka kam pyntriem la tip kyrteng kum u Tuniram Madri u ba la iaid shapoh Rangapara police station ha ryngkat ka khlieh briew ka ba u la thep hapoh ka pla. Ia utei u lanot la tip kyrteng kum u Hemram 55 snem rta.
Hadien katei ka jingjia, na ka liang ki bor pulit ki la kem noh ia une u briew na ka bynta ban pynlong ia ka jingtohkit, hynrei watla katta ia ka daw sha lyndet jong kane ka jingjia ym pat lah ban tip thikna.
Ka ba kum kane ka jingjia ka la jia ruh ha ka jylla Madhya Pradesh, ha ka ba uwei u briew u la khrai khlieh ia la u jong u mama 60 snem rta halor ka jingkynnoh leh byrtong bad iaid haduh 2 kilomitar ha ryngkat ka khlieh jong u bad u sdie hapoh Sidhi district jong ka Madhya Pradesh hashwa ba un shah kem noh ha ki pulit.
Kane ka jingjia ka la jia hapoh ka shnong Karimati ka ba hap hapoh Jamodi police station, kumba 10 km na ka district headquarter.La ong ba une u suba nong pyniap 26 snem rta u la suba ia la u jong u mama halor ka jingwanrah jingeh pyrshah ia u lyngba ki kam leh byrtong pyrshah ia u.
U heh pulit ka Jamodi ps, u Sheshmani Mishra u la ong ba une u briew ia u ba la tip kyrteng kum u Lalbahadur Gaud u la leit sha ka iingsah u mama jong u, u Maksudan Singh Gaud bad pom ia u da u sdie na u ryndang hadien ba ka la mih ka jingiania ka ba jur.
“Katei ka kam thombor ka la long ka ba shyrkhei kat haduh ba ka khlieh jong utei u briew ka la lait la ka jong na ka met,” ong u heh pulit.
