Nongpoh, Nailar 14 : Ka kynhun ANTF ka Ri-Bhoi District, hynne ka sngi Balang, kila ioh kem ia uwei u nongkhaii droks bad ioh kurup ia u heroin ba 2.47 gram na ka thain Nongpoh.
Une u nongkhaii droks u kyrteng u Vicky Lyngdoh ba na 20 mer, Pahammawlein, Ri-Bhoi. Ia une u briew la ioh kem da ka jingioh bat ia kawei ka kali Alto ML10-C-0012 kaba wan kiew na Byrnihat sha Nongpoh.
Halor ka jingai jingtip da u Addl SP (Crime), ka kynhun ANTF kala buh iaka khyrdop tala ha Downgate, Nongpoh bad kila ha ka por 2:50 janmiet, kila ioh ban bat ia kane ka kali.
Ki Pulit kila ioh ban kurup ruh ia 2 tylli ki mobile phone, POCO bad OPPO, 5 tylli ki nar injek bym pat pyndonkam bad ka kali Alto.
Ki Pulit kila register case ia kane ka jingjia ha Nongpoh Police Station bad ka jingtohkit mynta kala iaid shakhmat.
