Aizawl, Nailar 15 :U Myntri Rangbah (CM) ka Mizoram, u Zoramthanga hynne ka sngi Nyngkong u la ong ba ki jylla ka thain shatei lammihngi (Northeast) ki la ioh ia ka jingjop ha ki ba bun ki liang ha kine ki shi snem ba la leit noh wat hadien ki ba bun ki jingeh ki ba la pynlong da ka jingsaphriang jong ka jingpang covid-19.
Ha ba kren sha ki paidbah ha ka jingrakhe ia ka sngi laitluid jong ka ri (Independence Day) ha Aizawl, u CM u la ong ba na ka liang ka sorkar ka dang iai bteng ban shim ia ki sienjam ban pynkhhlain shuh shuh ia ki kam shong shngain.
U la ong ruh ba kam shym la don kano kano ka jingeh lane ka jingshong syier ha ka jylla namar ki sienjam ba la shim da ki bor pulit ha kine ki shi snem ki ba la leit noh.
Napdeng ki 1,633 tylli ki case kam bymman ba la rejistar, 676 tylli la dep ban pynlong ia ka jingtohkit, katba halor ki 12 tylli ki jingjia ki ba iadei bad ki kam shalan tiar siat la dep ban rejistar bad kumba 20 ngut ki nongkhaii beain ki la shah kem noh, ong u CM ka Mizoram.
“Ki bor ka ain ki la kem noh ia 2,425 ngut ki briew halor ka jingpynkhein ia ki kyndon jong ka Mizoram Liquor (Prohibition) Act, 2019 naduh ba la pyntreikam ia ka ha u bnai Jymmang May 2019, bad haduh 517 ngut ki nongkhaii drok ki la shah kem bad shah tian bishar ha kine ki shi snem ba la dep,” ong u CM Zoramthanga.
Na ka liang u CM u la khot ruh ia ki paidbah nongshong shnong ba kin iatylli lang kawei ban pynlong ia ka Mizoram ka jaka ka ba shongsuk shongsain bad ka ba kiew shaphrang.
Ha ka ba iadei bad ka jingpyntreikam ia ka skhim sam um Jal Jeevan Mission jong ka sorkar pdeng, u CM u la ong ba kane ka jylla haduh mynta ka la lah ban pynioh um iing sha ki 85,231 ki longiing ha ki 177 tylli ki shnong kyndong bad 1,13,800 tylli ki longiing ha ki jaka sor.
Ia ka sngi laitluid jong ka ri la rakhe ha baroh ki bynta jong ka Mizoram hynne ka sngi Nyngkong ha ka ba ia ki jingialang na ka bynta kane ka sngi la pynlong ha baroh ki nongbah jong ki district bad ki sor rit ki ba kongsan ka jylla.Hynrei ia ka jingialang ka ba heh la pynlong ha lammual lane ha ka madam jong ka Assam Rifles ha Aizawl.
