Nongstoiñ, Nailar 11: Ka West Khasi Hills Boxing Association, ka ai khublei kyrpang ïa ki thei bad ki rang ïa kura ha ki kyrdan sub junior bad junior, kiba la khur ïa ki nam jop ha ka jingïakhun ba la pynïaid da ka Meghalaya Boxing Association, naduh ka 7 tarik haduh 9 tarik mynta u bnai kaba dei ka lympung Annual State Boxing Championship 2024.
Ki nongïashim bynta kiba la wanrah burom ïa ka thaiñ ki long u Maitphang Mawsor u ba la khur takma rupa, I heprit Esawanbiang takma rupa bad Ibapynsuk Thabah takma rupa.
Kiba la wan ha ki kyrdan ba lai lane kiba ïoh khur ïa ka tama rnong ki long Medonlang Lyngdoh Marshillong, Fergie Gracia Wanniang bad Phidawankmen Kharbani.
Ka seng ka ai khublei ïa ki skul ki kmie ki kpa, kiba la ai lad ïa ki khynnah bad ki khun ki jong ki ban leit shimbynta ha ki lympung kiba pher. Kumjuh ruh ïa u DC Nongstoiñ Garod LSN Dykes, ïa ka DSO Nongstoiñ kong B. Syiem kiba la noh jingïarap na ka por sha ka por sha ka kynhun, na ka bynta ban pynurlong ïa ki jingangnud ki khynnah ïalehkai ïa kura jong ka thaiñ.
