Shillong Nailar 04: Ka Khun Hynniewtrep National Awakening Movement (KHNAM) ha ka sngi u Blei, kala pynpaw iaka jingkmen halor ka rai jong ka Dorbar Shnong Mawsynram ban khanglad ia ki riewngeit Hindu kiba thmu ban pynkylla jaka mane Blei Hindu ha ka jaka kyntang u Khasi.
U Working President ka KHNAM Bah Thomas Passah ula ong, “Ka seng ka dap da ka jingsngewkmen halor ka rai kaba ka Dorbar Shnong Mawsynram kala shim pyrshah bad khanglad ia ki nongiaid pilgrim jong ki riewngeit Hindu, kiba la pyrshang ban pynlong jaka mane Blei ia ka jaka kyntang jong u Khasi, kumba la buh da u longshuwa manshwa”.
“Ka krem Mawjymbuin kaba don ha Mawsynram ka don ka jingiathuh khana kaba kyrpang da ki spah snem mynta bad ka dei ruh kawei na ki jaka jngohkai pyrthei ba paw bha ha ka jylla. La katto katne snem kine ki riewngeit kila pynlong ia kata ka jingiaid kjat ryngkat ka riam kat kum ka jingngeit niam ka jongki, ha ryngkat ka jingrah ia ki jingknia bad kiwei kiwei da ka jingpyrshang ban pynlong jaka mane Blei ia katei ka jaka jngohkai pyrthei” ong u Bah Thomas.
“Ngi pynpaw ka jingsngew sarong bad ngi iaroh ia ka Dorbar Shnong ka Mawsynram kaba la lah ban iohi ia ka jingma ba lah ban wan lada ym shim khia. Ka seng ka don bad kan iai don ryngkat bad ka Dorbar Shnong halor kane ka jingthmu” la pynkut u nongialam ka KHNAM.
Lah ban ong, kawei ka kynhun jong ki riewngeit Hindu kala pynbna ban pynlong ia ka jingiaid kjat ne Yatra ban leit sha Krem Mawjymbuiñ uba don ha Mawsynram ha ka 10 tarik mynta u bnai.
