Shillong, Nailar 03 : Ka Khasi Students’ Union (KSU) ha ka sngi Saitjain, kala kyrpad ia baroh ki 13000 ngut ki samla kiba iakhun ia ka eksam MCS (Prelims), ba kin iasnohkti lang ha kaban pynkut noh ia ka bamsap hapoh ka Meghalaya Public Service Commission (MPSC) da kaba dawa ban pyllait paidbah ia ki marks jong ki.
Kane kala mih shisngi hadien ba ka MPSC kala rai ban nym pyllait paidbah satia ia ki marks jong ka eksam MCS Prelim hadien ka jingpyrshah jong ki katto katne ki samla ba iakhun ia ka eksam.
U Secretary jong ka Commission ha ka notice paidbah ula pyntip ba “Ka jingtyrwa ban pyllait paidbah ia ki marks jong ka MCS Preliminary Examinitation ka dei kaba la pyrshah jur da ki katto katne ki nong iakhun eksam namar ka lah ban ktah ia ka hok ba shimet jong ki, kaba dei ka hok tynrai jong ki kat kum ka Article 21 jong ka Riti Synshar ka Ri India”.
Ia kane ka notice la pyllait hadien ba ka KSU kala pynlong ia ka jingiashong kyllain mungor ban pyrshah ia ka jingleh bym hok ha ka rukom thungkam bad dawa ba dei ban pyllait paidbah ia baroh ki marks jong kiba iakhun ia ka eksam MCS.
“Ngi kyrshan ia ki palat 13000 ngut ki samla kiba iakhun ia ka eksam MCS prelim ban wanshakhmat bad ban pynkut ia kane ka kam bamsap hapoh ka MPSC da kaba thoh sha u Chairman ka Commission ba pynpaw ba phim don ia kano kano ka jingpyrshah ban pyllait paidbah ia ki marks. Lada phim iawan lang, ngin ym lah da lei lei ruh ban iakhun ia ka kam bamsap ha ka rukom treikam ka MPSC” ong u Chairman ka KSU Employment Monitoring Cell samlaReuben Najiar haba iakren bad ki nongthoh khubor.
Ula ong ba ka MPSC ha ka jingialang jong ka bad ki Nongialam ka KSU, kala mynjur ban pyllait paidbah ia ki marks jong ki samla ba iakhun ia ka eksam.
“Hynrei, ka jingbym lah ka MPSC ban bat iala ka kular da kaba rai ban nym pyllait paidbah shuh ia ki marks jong ki samla kynthup ki 62 ngut kiba mih kyrteng ha ka thup bynrap, ka pynngeit ia ngi ba ka don kaei re kaei ha lyndet” ong u samla Reuben haba pynkynmaw ba ka KSU ka khlem dawa ban khein duh ia ka eksam hynrei tang ka jingshai da kaba pyllait paidbah ia ki marks jong kiba ialeh ia ka eksam.
Haba kren ia ka daw ba ai da ka MPSC ba ka pynkhein ia ka Article 21 jong ka Riti Synshar ka Ri, une u Nongialam ka KSU ula ong “ Mynta, ka jingkylli hangne ka long ba kaei kata ka jingpynkhein ba ka MPSC ka kren hangne. Ka Commission kala pynmih ia ki kyrteng ha ryngkat ki roll number bad kimarks jong ki samla ba iakhun ia ka MPS Physical Test, kane kajuh ka Commission ka ong mynta ba ka jingpyllait paidbah ia ki marks ka dei ka jingpynkhein ia ka hok barieh ki shimet. Ngi tip balei ba ka MPSC ka sheptieng ban pyllait paidbah ia ki marks jong ki samla kiba iakhun ia ka eksam MCS prelim watla ngi dawa ban pynmih tang ki roll nombor ym ki kyrteng.
“Kumta, ka jingong ba kan pynkhein ia ka hok shimet ka long kaba bakla bad ka bym lah ban pdiang. Ka kam bala leh da ka MPSC ka pynshisha ba ka don kaei re kaei ha lyndet” ula bynrap.
U samla Reuben ula pyntip ruh ba u Chairman ka MPSC ula kyntait ban shim ia ka phone call ne jubab ia ka text message jong ka seng halor ka jingpynslem jong ka MPSC ban pyllait ia ki marks da kaba pynlip shisyndon ia ka phone.
Nalor kane, une u Nongialam ka KSU ula ong ba ka MPSC kala leh ia kaba bakla eh naduh kaba sdang da kaba pynlong ia ka jingkhmih biang ia ka answer sheet kaba ka Commission kam lah satia ban leh.
