Shillong, Nailar 04: Ka jingiakhih shong kyllain mungor ba khlem pud jong ki nongtrei SSA hapoh ka lama All Meghalaya SSA Non Teaching Staffs Association (AMSSANTSA) ka la poi sha ka sngi kaba saw hynne ka sngi Saitjain bad byrngem ban bteng ia ka jingiakhih haduh ba ka sorkar jylla kan mynjur ia ka jingpynkiew tulop ba 80%.
“Ngim pat long kiba la pynkhreh ban mih nangne tad haduh ba ka Sorkar kam pat mynjur ia ki jingdawa jong ngi,” ong uwei u nongialam jong ka seng.
U MLA ka VPP na Mawlai u Bah Brightstar Marbaniang u la long napdeng ki khyndiat ngut ki nongïalam saiñ pyrthei bad ki seng treimon sngewbha, kiba la ïakynduh ïa ki nongtrei kiba iakhih ban pynpaw ïa ka jingdon lang ha ka jingïakhun jong ki na ka bynta ka jingsiew kaba mar katjuh na ka bynta ka jingtrei kaba mar katjuh.
Ha ka sngi Thohdieng, ka seng ka la pynpaw ia ka jingsngewsih halor ka jingmih na ka jingialang jong ka Rationalization Committee ban eksamin ia ka jingtyrwa ban kyntiew bad pynbeit ia ka tulop jong baroh ki nongtrei jong ka Samagra Shiksha (Non-Academic).
“Ngim sngewhun ia ka jingmih jong ka jingialang mynta ka sngi. Ka jingiakren kam poi shano shano ruh, ngim shym la poi iakren wat ia ki kyndon treikam, kumta ka la long ka jingpynlut por”, la ong ka president ka AMSSANTSA ka Kong Jennyfer J Synrem hadien ba la wai ka jingialang.
“Kumta, ngi la rai ban bteng ïa ka jingïakhih shong kyllain mungor khlem pud jong ngi haduh ban da urlong ïa ki jingdawa jong ngi,” ka la ong haba pyntip ba ka jingïalang kaba ar jong ka komiti pynshong nongrim kan long ha ka sngi Palei jong ka taiew ban wan.
