Shillong, Nailar 13 : Ka National Peoples Youth Front lyngba u National Working President jong ka, u Bah Nickey Nongkhlaw u la kyntu ia ka All India Trinamool Congress ba ki dei ban peit shwa iala ka jong ka lyngkdong ha shwa ba kin kynthoh ia kiwei pat.
Haba kren bad ki lad pathai khubor, u Bah Nicky Nongkhlaw u ong ba ka NPYF ki sngew thamula haba ki iohi ia ki nongialam ka TMC ha ka Jylla kiba kynnoh bamsap ia ka sorkar jylla hapoh ka jingialam jong ka MDA.
“Shuwa ba phin khynra ia ka iing ka sem jongno jongno ka bha ba kin peit shwa ia ka iing la jong ka long kumno,” u la ong.
Utei u Nongialam ka NPYF u la ong ruh ba lada kdew lei ia ki nongialam ka TMC ki don bun bha kiba ngat ha ka jingshah kynnoh ba ki donkti ha ki kam bamsap kiba bun.
Katkum ka jingong u, ki kyrteng kiba paw ki kynthup naduh u General Secretary ka party, u Abishek Banerjee, nangta u Partha Chatterjee, u Anubrata Mondal, u Vinay Mishra bad ruh u Manik Bhattacharya.
Kawei pat ba utei u heh ka NPYF u kynnoh ka long ba dei ka nongialam jong katei ka party hi kaba ai jaka rieh ia ki briew na Bangladesh ba kin ioh ia ka jinglong trai shnong ha katei ka jylla. “Kumta kaei kaban jia ia ki paid khappud lane kane ruh ka jia hangne,” u la ong.
Nalor kine, u Bah Nicky u ong ruh ba kane ruh ka pynsuba ia ka jingbymnud jong ki nongialam ka TMC ban dawa pyntreikam wat ia ka Inner Line Permit kumba ki leh ha ka sngi ba ki dawa pynrung ia ka Ktien Khasi bad Ktien Garo ha nongbah Delhi dang shen.
