Nongpoh, Naitung 31 : Uwei u samla pule klas XII ka skulbah USTM, ula dkhat jubor iala ka jingim da kaba sdien phasi ialade hala ka jong ka hostel.
Kat kum ka khubor Pulit, la suba ba une u samla pule ula sdien phasi ialade ha ka miet jong ka 30 tarik Naitung.
Haba kren sha ki lad pathai khubor, u nonghikai Dr Pallab Kalita ula iathuh ba kane ka jingjia kala jia hapdeng ka por 9 baje haduh 9:30 eiei. U iathuh ba une u samla ula khang ialade hapoh ka kamra shuwa ban leh ia kane ka kam.
Haba ioh jingtip ia kane ka jingjia, la pyntip noh mar mar ia ka sha ki Pulit ka Khanapara Police Station, kiba la wan ban tohkit bad pynkit noh ia ka met sha Civil Hospital, Nongpoh ban leh ia ka post mortem.
Ki Pulit kila register case halor kane ka jingjia bad ka jingtohkit kala iaid shakhmat ban lapdien ia ki daw kaba pynlong ia une u samla ban dkhat noh shiteng por iala ka jingim.
