Shillong, Naitung 22 : Ka kynhun na ki 10 tylli ki Autonomous District Council (ADC) ka thain Shatei Lam Mihngi, kin leit iakynduh lashai ka sngi ia u Myntri kam Pohiing ka Ri Amit Shah ha Delhi, ban phah tuklar ha kaban wanrah bad mynjur noh ia ka Amendment ba tyrwa ban pynkylla thymmai ia ka Sixth Schedule ha ka Dorbar jong ka Parliament.
Ia kane ka rai la shim ha ka jingialang jong baroh ki Chief Executive Member (CEM) jong ki 10 ADC ba kynthup ia 3 tylli na Meghalaya, 3 tylli na Mizoram, 3 tylli na Assam bad kawei na Tripura, kaba long ha New Delhi hynne hi ka sngi.
Haba pathai ia ka khubor halor ka jingialang, u CEM ka KHADC Bah Pyniaid Sing Syiem ula iathuh “Ngi la iarai lang ban iakynduh ia u Myntri kam Pohiing ka Ri ban kyrpad ba un tuklar lem ha ka ban pynthikna ia ka jingwanrah noh ia ka Amendment jong ka Sixth Schedule ka Riti Synshar ka Ri bad ban air uh ia ka jingmynjur ha kane ka Dorbar jong ka Parliament”.
U pyntip ba u Amit Shah ula mynjur ban iakynduh ia ka kynhun nongmihkhmat na ki 10 tylli ki ADC lashai ka sngi.
“Ngin sa aiti ia ka dorkhas ba kyrpang iaka Sorkar Pdeng ban wanrah ia ka Amendment ka ban nang pynkhlain ia ki kyndon jong ka Sixth Schedule ha ka ban ai jingiada ia ki paid riewlum trai jylla jong ka thain Shatei Lam Mihngi” ong u Bah Pyniaid.
Haba pyntip ba ka KHADC kan aiti la ka jong ka dorkhas ha u Amit Shah, u CEM ula iathuh ba ka Council ka iai ban ia ka nongrim ba dei ban pynbun ia ki seat sha ka 37 tylli ha kaba 6 kin dei kiba jied da u paidbah bad 2 tylli kiba shu sieh.
Kumta long mynta ka KHADC ka don 29 tylli ki seat (MDC) ba jied da u paidbah bad uwei ba shu sieh.
“Ngi la ban jur ruh ia ka jingdonkam ban mait noh ia ka kyntien Unrepresented Tribe. Napdeng ki 2 ngut ki MDC ba shusieh, kawei yn bhah sha ki kynthei” ula pyntip.
“Haba phai sha ka jingpynlong ia ka elekshon ADC, ngi ai jingmut ba dei ban pynlong kat kum ka rule elekshon jong ka Sixth Schedule ym da ka Election Commission ka Ri India” ula bynrap.
 ka thain Shatei Lam Mihngi, kin leit iakynduh lashai ka sngi ia u Myntri kam Pohiing ka Ri Amit Shah ha Delhi, ban phah tuklar ha kaban wanrah bad mynjur noh ia ka Amendment ba tyrwa ban pynkylla thymmai ia ka Sixth Schedule ha ka Dorbar jong ka Parliament.){kind=link}