Shillong, Naitung 22 : Ka Myntri kam rep ka Jylla Kong Ampareen Lyngdoh ha ka sngi Nyngkong kala kular ban sa iakren bad ki Deputy Commissioner halor ka kam ba iadei bad ka jinghap siew khajna jong ki kali kit marrep ha ki Weigh Bridge ha Jylla.
Hadien ka jingiakynduh bad ki nongialam ka FKJGP, ka kong Ampareen kala ong “Ngim don satia ia ka bor, lada don shisha kum kane ka jingkynnoh, ki dei ban iaid kat kum ka lynti kaba dei, ka myntri kan hap sngap ia kaei kaba biang tam, kaban pynmyntoi ia baroh ar-ki nongkhaii bad ki nongrep”.
“Phim lah ban sngap tang shiliang, baroh kin ioh ia ka lad bad ym dei ban klet ba ngi don ruh ki District Council, kaba don bynta ha kane ka kam. Ka Sorkar kan ym lah ban shim rai halor kine ki kam khlem ka jingiasyllok kaba thikna” kala ong.
“Nga la kular ia ki ban pynlong ia ka jingiakren. Ailad shuwa ba ngan tip shaphang kane ka kam. Ngam don jingtip satia ia kiei kiba jia, nga dang sdang ban sngewthuh mynta, hynrei nga donkam ia ka jingshai bad ngan sa shong bad baroh arngut ki DyCM ba kin btin lynti lang halor kane ka kam” kala bynrap.
Shuwa kane, u President ka FKJGP Bah Dundee C Khongsit ula ong ba ka kynhun kala kyntu ia ka Myntri ba kan tuklar lang da kaba iakren bad ka Sorkar Jylla ba kan pyllait noh ia ki kali kit marrep na ka jinghap siew khajna ha ki weigh bridge.
Ula ong ba la kyntu ruh ia ka Sorkar ba kan pyntreikam noh da ka Road Delivery Challan.
