Shillong, Naitung 17 : U Myntri ka Tnad Pule Puthi Rakkam A Sangma ha ka sngi Ba-ar, ula pyntip ba ka Sorkar Jylla kala shim ia baroh ki sienjam ba donkam ban shim ha kaban lah leh eiei ban pynduna ia ka jingpep skul shiteng por jong ki khynnah da kaba pynjanai ia ka rukom ai jinghikai hapoh ka Jylla.
“U Myntri Rangbah ka Jylla ula shong bishar kam halor ka jinglong jingman ka pule dangle hapoh ka Jylla ha ka taiew bala lah bad ngi la shim ia baroh ki sienjam ban kyntiew bad pynjanai ia ka rukom ai jinghikai hapoh ka Jylla” ong u Sangma.
Kat kum ka Unified Digital Information on School Education (UDISE) plus data 2021-22, ka Meghalaya ka dei kaba jur bha ha ka jingdon ki khynnah ba pep shiteng por ia ki jingpule ha baroh ki kyrdan kaba kot aduh 9.8% ha ka Lower Primary, 9.4% ha ka Upper Primary bad 21.7% ha ka Secondary, kaba heh bun shah ia ka National Average kaba long 1.5%, 3.0% bad 12.60 %”.
Haba shimkhia ia kane ka kaiphod, u Sangma ula iathuh ba ka Sorkar kala shim ia shibun ki sienjam bad ki prokram ba kynthup ia ka jingpynkylla ia ki kot skul, ka jingshna bad pynbha ia ki Iingskul ha ka Jylla baroh kawei nalor kiwei kiwei ki sienjam.
“Ngi la shim ruh ia ki lad ki lynti ban pynjanai ia ka PGI ranking bad ngi la plan ruh ia ki sienjam bapher bapher ban pynduna ia ka jingpep skul shiteng por ha ka Jylla” ula bynrap.
Haba pyntip ba ka jingpep skul shiteng por ka jur eh ha baroh ki District ka Ri-lum Garo, u Myntri ula ong ba ki khynnah kiba pass ia ka SSLC ki long tang 37% ha kine ki san snem bala leit noh.
“Ka dei kaba ima bad kaba sngewkhia bha ia ngi. Mynta, ngi la ithuh ia 2-3 tyli ki District, kiba tlot eh bad kumta ngi la shim ia ki sienjam ban pynjanai ia ka pule dangle ha kine ki District” ula ong.
Nalor kane, u Sangma ula pyntip b aka Sorkar kala bthah ia ki Deputy Commissioner ba kin leit jurip ia ki skul kiba duna bha ka jingpass ki khynnah.
Ha kajuh ka por, u Myntri ula pyntip ba ka jingialang kala long dang shen bad ki Ophisar ka Meghalaya Board of School Education (MBoSE) ban wanrah ia ki kot skul ba don ia ki QR code.
“Ngi kwah ban wanrah ia ki kot skul kiba don ia ki QR code ha kaba ia ki lynnong yn lah ban ai jinghikai ruh lyngba ki video. Lada ki khynnah kim lah ban kem bha ia ki jinghikai ha ki klas, ki leit sha iing bad ha ka jaka ban leit khreh kot, ki lah ban sngap hala iing lyngba ki jinghikai na ki video” ula ong.
 plus data 2021-22, ka Meghalaya ka dei kaba jur bha ha ka jingdon ki khynnah ba pep shiteng por ia ki jingpule ha baroh ki kyrdan kaba kot aduh 9.8% ha ka Lower Primary, 9.4% ha ka Upper Primary bad 21.7% ha ka Secondary, kaba heh bun shah ia ka National Average kaba long 1.5%, 3.0% bad 12.60 %”.){kind=link}