Shillong, Naitung 15: Ka 19-South Shillong Advisory Committee (SSAC) ba khlieh da u MLA ka BJP Bah Sanbor Shullai hynne ka sngi Nyngkong, kala ai jingmut bad dei ban bhah noh mar 30% ha kaban aikam aijam ia ki paid Khasi-Jantia bad Garo katba 27% dei ban bhah na ka bynta ki longing kiba duk.
“Ka SSAC hadien ka jingiasyllok bad kiba bun balang, kala phah ia ka jingtyrwa da kawei ka sur katkum ka jingdon paid ha ka khanasamari jong u snem 2011 bad kaba iaid ryntih bad ka Roster System kaba la pyntreikam da ka sorkar Meghalaya” ong u Bah Sanbir Shullai ha kadorkhas kaba la phah sha ka Expert Committee on State Reservation Policy.
Ula ong ba ka Advisory Committee kala ai jingmut ban ba ha kajingbhah kam dei ban bhah 30% ia ki Khasi-Jaintia, 30% ia ki Garo, 27% ia kiba wan na ki longiing baduk, 6% ia kiwei pat ST/SC & OBC bad 7% ha ka Unreserved Category.
Ula bynrap ba na ka 27% ka bhah jong ki longing baduk, ka committee ka tyrwa ba dei ban bhah 87% ia kiba duk na ka jaidbynriew Khasi-Jaintia bad Garo, 6% ia kiba duk kiba dei na kiwei pat ki ST bad SC (3%) & OBC (3%) bad 7% ia kiba duk na ka unreserved category.
“Na ka 27% ka jngbhah ia kiba duk, dei ban bhah 87% ia kiba duk na ki jaidbynriew Khasi, Jaintia bad Garo bad kaba sah 6% ia kiwei pat ki ST, SC & OBC bad 7% ha ka unreserved category khnang ba kane kan ai jingmyntoi ia ki longiing baduk khamtam ia kiba na ki thaiñ nongkyndong kiba duh ia ka lad ban iohkam lyngba ka bhah kam. Kine ki longing kiba duk ki kynthup ia ki khun jong ki nongkamai kali, nongdie madan, nongbtrei ha iing briew, nongtrei bylla sngi bad ki nongtrei ha ka kontrak, Asha, Aganwadi, nongrep bad ki nongbylla bad ym dei ban kynthup ia ki nongtrei sorkar ha katei ka kynhun”.
“Na kitei ki 5 tylli ki kyrdan, 10% dei ban bhah kyrpang na ka bynta kiba don jingduba ha ki dkhot met bad ki riewshimet kiba la pawnam ha ka sports, arts bad culture,” ong u Bah Sanbor Shullai.
Nalor kane, u Bah Sanbor ula pyntip ba ka advisory committee kala ai jingmut ruh ba dei ban kynthup ia baroh ki bar jylla kiba la shong la sah naduh mynshwa ha ka jylla ban pynhap ha ka OBC category bad ia kito kiba dei ban hap ha ka Schedule caste dei ban pynhap ia ki ha ka SC category. Ka advisory committee kala ai jingmut ruh ba dei ban bhah 3% na ka bynta ki OBC & SC bad 3% ia kiwei pat ki ST.
Ula ong, ba ka advisory committee kala ai jingmut ruh ba ha ka jingbym don kino kino ki kyrtong kiba dei na kiwei pat ki ST,SC, OBC bad unreserved category ha kano kano ka district ia kitei lah ban pyndap da kito kiba wan na ki longiing kiba duk kiba na ka jaidbynriew Khasi- Jaintia ha baroh ka Khasi bad Jaintia hills (kynthup ia ka Ri-Bhoi district) bad ki Garo hapoh ka Garo Hills na ka bynta ki kam ha ki district level ne sub-divisional.
“Ka advisory committee kala ai jingmut ruh ba ha ki kam ha ka district level ne sub- divisional, na ka 87% ka jingbhah kaba kyllum lang dei ban bhah 50% ia kiba wan na ki longing baduk kiba dei ki Khasi-Jaintia ha baroh ka Khasi bad Jaintia Hills district kynthup iaka Ri-Bhoi district) bad ki jaidbynriew Garo ha Garo Hills,” la pynpaw u Bah Sanbor bad ka bynrap ba ka sorkar jylla kadei ban khmih bad pynbeit thymmai man la ka 10 snem iaka bhah iohkam iohjam ha ka jylla.
 ba khlieh da u MLA ka BJP Bah Sanbor Shullai hynne ka sngi Nyngkong, kala ai jingmut bad dei ban bhah noh mar 30% ha kaban aikam aijam ia ki paid Khasi-Jantia bad Garo katba 27% dei ban bhah na ka bynta ki longing kiba duk.){kind=link}