Shillong, Naitung 10 : Ka Hynñiewtrep Border Disputed Redressal Forum ( HBDRF) ha ka sngi Balang, kala dawa ia ka Jaintia Hills Autonomous District Council (JHADC) ba kan khmih lang ia ki Shnong Khappud ha ka jingpynbeit thymmai ia ki lai tylli ki Constituency jong ka Council.
Ka HBDRF hapoh ka jingialam u Chairman Bah C Sungoh, kala iakynduh markhmat ia u Chief Executive Member (CEM) ka JHADC Bah Thombor Shiwat bad aiti ruh ia ka dorkhas kaba kdew ia ki mat jingdawa.
Kat kum ka dorkhas, ka HBDRF kala pynpaw ba ha ka 10-Mynsngad Khanduli Constituency, kawei ka shnong ba kyrteng ka Rtiang Sanphaw, kam shym la paw satia ha ka thup kyrteng ki shnong kiba hap ha kane ka Constituency. Kala ong ba ka JHADC ka dei ban kynthup lang noh ia kane ka shnong ha kane ka constituency.
Haba pynksan ia kane, ka HBDRF ka pyntip ba kane ka Rtiang Sanphaw ka dei kaba hap hapoh ka jingkhmih jong ka United Khasi Jaintia Hills District Council naduh ba pynkha ia ka ha u snem 1952 bad hadien bala pyniakhlad ia ka JHADC bad KHADC, kane ka shnong ka dei kaba la pynhap pura hapoh u pud u sam ka JHADC bad Jylla Meghalaya.
U Bah Sungoh u pyntip ba kane ka shnong kam hap satia ha ka thup ki jaka iakajia pud bad ki nongshongshnong (ba kynthup ia ki Khasi-Pnar, Nepali bad khambun ki Karbi), kila ioh ruh ia ka iingskul na ka JHADC bad ka skhim ICDS nalor kiwei kiwei ki skhim na ka Jylla Meghalaya.
Ula pyntip ba ki nongshongshnong ki don ruh ia ka Election Photo Identity Card (EPIC) jong ka Meghalaya bad haduh ka elekshon MLA-2013, ki paidbah ki dang iathep vote ha ka 1-Nartiang Constituency.
“Hynrei tang namar ba bun ki nongshongshnong ki dei ki Karbi, bun kila kyntait ia ki skhim bad jingiarap ka Meghalaya bad kwah noh ban pyniasoh sha Karbi Anglong, Assam. Lehse dei na kane ka daw ba ki nongsynshar ka Jylla kila kum klet noh ia ka” ula ong.
U Bah Sungoh ula ong ba ka HBDRF ja dawa ia ka JHADC bad ka Delimitation Committee ba kam dei ban iehnoh ia kane ka Shnong. “Ngi donkam ia ka khyndew ka shyiap bad u pud u sam ym tang ia ki jaitbriew..Ban iehnoh tang namar ba shong bas ah da kiwei pat ki jaidbynriew ka long kaba bakla shibun” ula ong.
Kumjuh ruh, ka HBDRF kala iathuh ba ha Barato-Mukroh Constituency ruh ka don kawei ka Shnong ba paw kyrteng ka Lakaroi Pnar ia kaba la ai jingmut ban pynkylla noh ia ka kyrteng da kaba pyndam ia ka kyntien Pnar khnang ba kan nym mih ka jingsngew iapher Jaidbynriew ne pyniakhlad ia ki nongshongshnong jong kane ka Shnong kaba long hapdeng ki Karbi bad ki Khasi Pnar.
Nalor kane, kala kdew ruh sa ia kawei ka Shnong kaba ki klet ha ka Delimitation Committee bad kane ka dei ka Tahpat Pnar kaba don hajan jong ka shnong Lapangap. Ka HBDRF ka dawa ba dei ban weng noh ia ka kyntien Pnar bad ai beit noh tang Tahpat namar hangne ruh, kiba bun ki nongshongshnong ki dei ki Karbi.
“Da kaba leh kumne, kan long kum ka jingpynheh pynïar ka Council ïala u jong u tnum u thyndai bad kan ïarap ruh shibun ban pynskhem ïa u pud u sam ka khyndew ka shyiap khamtam ban iada naka jingkyntur pud bad kamtrai jubor daka Karbi Anglong Assam” kala ong.
Ka Forum ka dawa ruh ban kynthup lang noh sa bad ka shnong Mowjem Pyllun hapoh jong ka 14 – Sahsniang Mowkaiaw Constituency. Kane ka shnong kala ïoh jingithuh naka Jaiñtia Hills Autonomous District Council bad u Waheh Chnong jong kane ka shnong ruh ula ïoh Syrnod Waheh Chnong naduh ka snem 2022 kumta dei ban kynthup lang noh ïakane ka shong bad ki dong ki kyntoid baroh ki ba don hapoh jongka shapoh kane ka constituency kane kan ïarap shibun ban ïoh pynrung noh ïakane ka shnong bad ïaka Elaka Labang Nangphyllut ( ,Block-1 ) hi baroh kawei shaka jylla Meghalaya kumba kane ka thaiñ ka dang don hapdeng ka re-transfer area.
Ka HBDRF kala kyntu ia ki paid nongshongshnong ka Ri-lum Jaintia ban ai ka jingiatreilang bad ka Delimitation Committee jong ka JHADC khnang ban lah wanrah ia ka jingia sngewthuh jingmut ha kaba pynbeit ia kane ka kam.
