Shillong, Naitung 09 : Ka Sorkar Jylla kala rai ban shong bishar thymmai noh ia ka bond policy (ka jingiateh kular bad ki samla ba leit pule doktor) khnang ban weng noh ia ka jingeh na ka jingduna jong ki doktor hapoh ka Jylla.
Ia kane la pyntip da ka Myntri ka Koit ka Khiah Kong Ampareen Lyngdoh ha ka sngi Ba-ar, hadien ka jingialang bad ka kynhun ka Khasi Students’ Union (KSU), kaba la leit phah tuklar ban pynthikna ia ka jinglong shai bad khuid ha ka rukom ai bhah sha ki samla pule doktor na ka bhah ka Jylla.
“Balei ba na ka snem sha ka snem, ka nombor jong ki medical seat kala nang kiew ia ki samla pule ka Meghalaya bad balei ba ngi dang don ia ka jingduna doktor kaba bun bha?. Namar kata, ngin sa shong bishar thymmai noh ia ka bond (policy). Ngin sa shong bishar thymmai ia baroh kine ki kam ba kongsan ban pynthikna ba ki doktor, kiba ioh ia kane na ka Jylla Meghalaya kin wan phai pat sha Jylla Meghalaya” ong ka kong Ampareen.
Kala ong ba ka Tnad ka dang iakren bad ka Tnad Law ban shong bishar thymmai bad khmih biang ia ka bond policy ban pynthikna kat kaba lah, ba ki doktor jong ngi bad ki samla pule kin wan phai pat ban ai ka jingshakri sha ki paidbah ka Jylla Meghalaya.
“Ka por kala iaid la slem bha, ba ki doktor ba pass na ka bhah ka Jylla la iohi ba kim shym la wan phai shuh sha ka Jylla…kumta ngi hap ban khmih ia kane bad ngi kyrmen ba naba ngi iohi ia ka jing bun ki nongiakhun ban ioh leit pule MBBS na ka bhah ka Jylla, ka dei ban don ruh ka jingkitkhlieh ban wanphai sha Jylla Meghalaya” kala bynrap.
Kat kum ka jingong jong ka, ka jingioh bhah ka Jylla ban leit pule MBBS kala nang kiew bad mynta ka Jylla kala ioh haduh 94 seat.
“Ngi kyrmen ba kine ki jingioh seat kin nang btang ban kiew ha ki snem ban wan” kala ong.
, kaba la leit phah tuklar ban pynthikna ia ka jinglong shai bad khuid ha ka rukom ai bhah sha ki samla pule doktor na ka bhah ka Jylla.){kind=link}