Nongstoin, Naitung 09 : Ki Pulit ka Nongstoiñ Police Station, ki la ïoh ban kem ia u briew uba la phetrieh hadien ka jingthang ia la ka jong ka Iing, ki tiar ki tar, ki jain ki nep bad wat ia ki kot skul jong ki Khun
Une u briew u kyrteng u Albertstar Nongphud 43 snem ka rta. Ia une u briew la kem ha ka sngi saitjain.
Kat kum ka khubor Pulit, une u briew ula leh ia kane ka kam bymman ha ka 5 tarik Naitung ha ka shnong Phudumbah Sepngi, West Khasi Hills.
Ki Pulit ki iathuh ba ha ka por 1 baje mynstep, une u briew ula sei ia ki tiar ki tar na Iing sha phyllaw bad ula thang ia ki bad hadien kane ula thang sa ia ka iing, kaba ma u bad ka kurim lem bad ki khun ki iashong iasah.
Ki bahaiing hasem ka kurim, kila leit ban ujor da ka ejahar sha ki Pulit halor kane ka jingjia.
Ia une u briew la ialam tian bishar hakhmat ka Iingkashari kaba la hukum ban set ia u hapoh ka Judicial Custody.
