Shillong, Naitung 08 : Ka Chairperson ka National Commission for Women (NCW) Rekha Sharma ha ka sngi Nyngkong, kala pyntip ba ka Commission kala iarap mynta ia ki kynthei riewlum ba kin sdang seng ia ki kam ha ki jaka khlaw khamtam ha ki jaka ki bym don ka jingthung dieng.
Haba kren sha ki lad pathai khubor, ka Rekha kala ong “Kane ka dei kawei na ki sienjam ba thymmai, kaba ka NCW kala shim kyrpang na ka bynta ki kynthei ka thain Shatei Lam Mihngi namarbun ki kynthei ka thain ki dei ki riewlum bad ki don shibun bah ki khlaw ha ka thain, kumno kin lah ban kyntiew ia ka ioh ka kot da kaba trei ha ki khlaw. Baroh ngi tip ba ki kynthei ki tip bha shaphang ki khlaw bad ki jingthung jingtep kiba don ha ki la ka dei ki kynbat dawai ne kino kino ruh”.
Ka Rekha ka pyntip ba ka NCW kala buh ia bun ngut ki nongai jingkren, ki resource person kiba la ai jinghikai ia ki kynthei ba kin sdang iala ki jong ki kam da kine ki jingmih na ki khlaw la ki dei ki kynbat dawai, ki kam jngohkai ia ki khlaw ne kiwei kiwei.
Kala pyntip ia kane ka prokram la pynsdang na Shillong da ka jingkyrmen ba kan iarap ia ki kynthei ka Jylla Meghalaya.
