Shillong, Naitung 08 : Arngut ki Khynnah ba dang hapoh 11 snem, kila iap ngam jyllop ha kawei ka pung ba dang shu tih thymmai hapoh ka shnong Sohmynting, kaba jngai kumba 12 Km na Jowai, West Jaintia Hills.
Kine ki arngut ki khynnah ki kyrteng u Sambud Suting ba 10 snem bad u Armanki Suting ba 11 snem.
Kat kum ka khubor Pulit, la iathuh ba saw ngut ki khynnah kila ialeit sha katei ka jaka hynrei arngut na ki khynnah kiba iap, kila kynthoh shapoh ka pung ban iajngi katba arngut kila sum harud.
Ki iathuh ba ki arngut kiba don harud ka pung, haba iohi ba kine ki arngut kiba kynthih kim shym la mih shuh sha suin, kila leit ban pyntip sha ki briew ba don marjan kiba la wan ban pyrshang pyllait ia kine ki arngut hynrei kim shym la lapdien satia.
La iathuh ba ia ki metiap la lap hadien bala pynrngat ia ka um na pung da kaba pyndonkam ia ka puh shilum.
