Phaikhmat ka NCW ban wad bniah ia ka jingbun ki Longkmie ba khlem lok ha Jylla

Ki kynthei ki dang kham shngain ha NE ban ha kiwei ki bynta ka Ri :Rekha

Shillong, Naitung 08 : Ka National Commission for Women (NCW) kan pynlong ia ka jingwad bniah halor ka kam ba iadei bad ka jingnang bun jong ki Longkmie ba khlem lok ha Jylla Meghalaya kaba ai jait Kmie.

Haba iakren bad ki lad pathai khubor, ka Chairperson ka NCW Rekha Sharma kala ong “Ha Meghalaya, lada phi iathuh ba ki don bun ki longkmie ba khlem lok da ka jingleh donbor, ngan kmen palat ban wad bniah. Ngan sa bthah ia ka kong Delina Kongdup (dkhot NCW) ban wad bniah bad peit ia kaei kaba ngi lah ban iarap”.

“Hynrei, ka jinglong kmie khlem lok da kaba jied hi, nga tharai kam donkam ia ngi ban tuklar hynrei lada ki dei kiba shu shah leh beijot ne shah leh donbor, kane ka dei kawei pat ka bynta- Ngi hap ban tuklar bad iarap ia ki” kala ong.

Kat kum ka kaiphod halor ka ‘Exploratory Study on the Socio-Economic Status and Problems of Single Mothers in Meghalaya’ bala leh da State Commission for Women ha u 2022, ki don haduh 3078 ngut ki longkmie ba khlem lok ha ki 7 tylli ki District napdeng ki 12 tylli kiba la dep leh survey.

La ong ba haduh 46.2% ki dei ki bym nang bym stad katba 28.4% ki dei kiba dang pyndep tang ia ka Primary school.

Halor ka jingpyntreikam ia ki ain kam bymman ba thymmai, ka Chairperson kala ong “Hooid kan iarap bha ia ki kynthei namar lada u briew u kular ban iathoh kurim bad iashongkha ia kane ka briew hynrei u khlem shongkurim pat ia ka, une u briew u lah ban shah pynngat ha ka ain. Kane ka dei ka ain thymmai kaba la mih. Wat ha ka IT Act, lada ki briew ki kren tohmet ia ki kynthei online, ki lah ban shah pynngat kam bymman ha ki Pulit. Ki don shibun ki kyndon jong kane ka ain thymmai, ki ban iarap bha ia ki kynthei”.

Haba kylli ia ka jingnang jyllei ki kam bymman pyrshah ia ki kynthei, ka Rekha kala ong ba ia kine ki kam la pyntip namar ba ki kynthei mynta kila tip iala ka jong ka hok nalor ki lad pathai khubor bad ki Pulit kila trei khlem shongthait ban pathai bad register ia kum kine ki case.

Hynrei kala pynsngew pat ba ka thain Shatei Lam Mihngi ka dang dei hi ka jaka ba shngain eh ia ki kynthei haba ianujor bad kiwei ki bynta ka ri India.

Ka Rekha ka pyntip ba ki dkhot ka NCW kila shimkhia bha ia kawei pa kawei ka case ba iadei bad ki kam bymman pyrshah ia ki kynthei ym tang ha Meghalaya hynrei ha man ki Jylla ka thain Shatei Lam Mihngi.

Kala pyntip ba ka Commission kala shim suo motu case ruh pyrshah ia ka jingshah shoh tohmet jong kawei ka kynthei ha ri-lum Garo, kaba dang shu jia shen.