Agartala, Nailar 12 :U Secretary ka Seng CPI-M ha Tripura, u Jitendra Chowdhury u la kynnoh ba katto katne ki bor pulit ki dei ki ba iatreilang ryngkat ryngkat bad ki kynhun runar ba la kyrshan da ka BJP ki ba donkti ha ki kam thombor pyrshah ia ki nongtrei jong ka seng Congress ha Jirania.
“Ki nongtrei ka party Congress ha Tripura ki la ngat ha ka jingshah thombor wat ha ka por ba ki don hapdeng ka jingpeit jong ki pulit.Kane ka la batai hi halor kiei kiei baroh.Lada don ki ba shah thombor hapoh ka jingpeit jingkhmih jong ki pulit, kata hi ka pynshisha ba ki pulit ki dei ki ba ia donkti lang bad ki rinar ki ba la pynkhreh ban leh ia ki kam thombor,” kynnoh u Chowdhury.
Ia kane une u nongialam ka CPI-M ka Tripura u la pynpaw ha ka kren sha ki lad pathai khubor hadien ka jingleit jurip ia u MLA ba la shah pynmynsaw ka seng Congress u Sudip Roy Barman hapoh GBP hospital.
Nalor kata u la ong ba ka ba kum kane ka jingpyrshang la leh ruh da ka seng BJP ha Khowai.Ki nongkyrshan ka BJP ki la pyrshang ban pynbitar ia ki nongtrei ka CPI na ka bynta ban pynmih ia ki kam iaumsnam.Hynrei, la kumno kumno ngi la lah ban tehlakam ia la ki jong ki briew ha ka ba la lah ban kiar na ka jingiakynad.Ia ka ba kum katei ka jingjia la sakhi ruh ha Jirania hadien ba ki bor pulit ki la long ki nongkyrshan halor ka jingpynkhreh jong ka BJP da ki kynhun runar ban thombor pyrshah ia ki nongtrei ka seng Congress ki ba don hapdeng ka jingpeit jong ki pulit,” ong u Chowdhury.
Shuh shuh u la ong ha ka por ba ka ri ka la rakhe ia ka jingdap 75 snem jingioh laitluid, hynrei ki riti synshar khadar jong ka ri India ki la dkoh ha Tripura.
Ha kawei pat ka bynta, na ka liang ka Tripura Youth Congress ruh ka la pynlong ia ka jingkhih hakhmat ka iingsah jong u Myntri Rangbah (CM) ka jylla ban dawa ban pynshitom mardor iau SDPO ka Jirania.
“Ha ka por ba u Sudip Roy Barman u la ngat ha ka jingshah thombor, u SDPO u la ieng na ka jingjngai ka ba tang 200 mitar na ka jaka ba la jia.Hapoh ka hukum ka jong u baroh ki bor pulit kim shym la donbor satia,” kam ka Tripura Youth Congress.
Ka Seng Congress ha Tripura ka la kynnoh ia ka jingdonkti jong ka BJP halor kane ka jingshah thombor u MLA jong ka u Sudip Roy Barman lem bad kiwei pat ki nongialam jong ka party ka ba la jia hynnin ka sngi Palei.
“Ngi pynrem jur ia katei ka jingshah thombor jong u Sudip Roy Barman lem bad kiwei pat ki nongialam ka Congress ha ka kynhun runar jong ka BJP,” ong ka Seng Congress ka Tripura.
Ka Seng Congress ka la ong shuh shuh ba ka kyrmen skhem ba ki riew paidbah kin sa ai ia ka jubab ka ba biang halor kine ki kam thombor lyngba ki vote ki jong ki.
Une u MLA ka Congress ka Tripura, u Sudip Roy Barman u la ngat ha ka jingshah thombor ha ka kynhun ki runar katba u dang don hapoh ka kali ka jong u ha ki bynta jong ka Rani Bazar ha Agartala hynnin ka sngi Palei.Ha kane ka jingshah thombor u Barman u la ngat ha ka jingmynsaw na ki bynta jong ka met bad ka khlieh.
Nalor u Barman baroh ki don 11 ngut ki nongialam bad nongtrei ka Seng Congress ki ba la shah pynmynsaw, kata ka ba kynthup ia u working president jong ka seng, u Sushanta Chakraborty.
U Barman u la ngat ruh ha ka jingmynsaw hadien ba u la shah thombor ha ka kynhun ki runar ha ka jingjia ka ba la jia ha ka 19 tarik u Jylliew ba la dep ha Agartala.
