Shillong, Naitung 02: Ka CGST Shillong Commisionerate hynne ka sngi Baar kala rakhe iaka jingdap 7 snem jong ka jingpyntreikam ia ka Goods and ServicesTax ne GST Act ha ka jingialang kaba la pynlong ha State Convention Centre, Shillong.
Ha kane ka jingrakhe la iadonlang u Commissioner ka GST Shillong u H Soikhanthang, ka Commissioner jong ka Audit ka HM Anal, u Bah KK Marpna na ka State GST, u ADC ka GST Shillong u Pauzakham Ngaithe bad kiwei kiwei.
U Bah KK Marpna ula ong ba ka 1 tarik u Naitung 2017 kadei ka sngi kaba nsah jingkynmaw ha ka histori jong ka ri ha kaba iadei bad ka jingshim ia ka khajna bad ka jingsdang pyntreikam ia ka GST kala wanrah iaka jingkylla halor ka jingioh lum ia ka khajna hapoh ka ri bad kala don ruh ka jingpyniaid ruh ia baroh ki khajna jong ki sorkar jylla bad ka sorkar pdeng.
Ula ong, ba kane ka rukom pyntreikam ia ka GST kala wanrah iaka jingkhuid jingsuba ha kaba iadei bad ka jinglum jinglang ia ki khajna hapoh ka ri bad ha kine ki 7 snem kiba la leit ka tnad lum khajna jong ka jylla kala iatreilang bad ka tnad jong ka sorkar pdeng kiba la ai ka jingkyrshan kaba radbah bad kumjuh ha kaban ioh ia ki jinghikai ki bapher bapher kaba la long ka jingmyntoi kaba khraw.
Katba ka HM Anal kala ong ba ka GST kala noh synniang borbah ban kyntiew ia ka ioh ka kot jong ka ri bad ia ka jingkhuid jingsuba bad ka rukom treikam kaba iaid beit iaid ryntih.
“Mynta ka jingiohlum ia ka GST hapoh ka ri ka long kumba 1.6 Lak Klur bad bun ki kam khaii pateng kila rejistar hapoh jong ka GST bad ka jingbud ryntih jong ki nongsiew ia ka khajna kala kiew bha bad kane kala urlong kadei lyngba ka jingiatreilang hapdeng ki nongkhaii pateng, ki riewstad ha ka liang ka khajna bad ki nongshong shnong ka ri” ong ka HM Anal.
Kala iathuh ruh ba kamram jong ka tnad Audit ha ka GST, ka sorkar ka long kaba shimkhia bha ba kan don kano kano ka jinglait tuh ha ka jingioh pdiang ia ka khajna bad ka ain jongka GST kala kynthup lang ia kattio katne ki kyndon ban tehlakam ba kan ym don kano kano ka jinglait tuh jong ka khajna bad dei halor kane ka bynta ba ka tnad Audit ka don ia ka bynta kaba khraw ban leh ha kane ka phang.
Kala iathuh ruh ba ka kamram jong ka Audit ka long ban peit la kiba dei siew ia ka khajna kila dep siew thikna ne em ia ka khajna katkum ka dor kaba la buh, ban peit ba kamdei ban don ka jingsiew duna ia ka khajna.
Ha kane ka sngi la pynlong ruh iaka jingiakob iatainia hapdeng ki samla pule ka jylla halor ka mat : GST a game changer for both Tax Payer and Revenue Department.
Kine ki heh ki haiñ kila sam ia ki khusnam sha ki nongjop ha ka jingiakob iatai nia bad la ai jingithuh ruh ia ki karkhana bad ia ki riewshimet kiba ju siew thikna iaka khajna GST.
