Lucknow, Naitung 02 : Haduh 107 ngut ki briew kila iap na ka jingia-iuh para briew ha ka jingialang ialap niam kaba long ha Hathras District ka Uttar Pradesh hynne ka janmiet sngi Ba-ar.
Kane ka jingia-iuh para briew kala jia hadien ka jingkren jong u nongialap niam, Bhole Baba, uba la ai jingkren sha ki nongbud jong u ha ka len bala pynieng kyrpang hapoh ka shnong Rati Bhanpur, kaba hap hapoh ka thain Sikandra Rau jong ka Hathras District.
Kat kum ka jingiathuh ki Pulit, ka jingshem ba malu mala ka antad ba ka dei ka jingiap-op ha kane ka jaka kaba la dap sman da ki briew, kaba lam sha ka jinglynga baroh ki nongleit sngap ia ka jingialap. Kane kala pynlong ia ki briew ban ia mih bad mareh na kane ka jaka bad lam pat sha ka jingia-iuh para briew. Ka jingtohkit ban lap ia ki daw tynrai ka dang iaid shakhmat.
U Myntri Rangbah ka Uttar Pradesh Yogi Adityanath ula shimkhia mardor ia kane ka jingjia bad ula pynbna ia ka song jingiarap sha ki bahaiing jong kiba iap haduh T. 2 lak bad T.50 hajar sha kiba mynsaw.
Ka President ka Ri Droupadi Murmu bad u Myntri Rangbah Duh Narendra Modi, kila pynpaw ia ka jingsngewlem sha ki bahaiing hasem jong kito ki briew kiba iap ha kane ka jingjia.
