Shillong, Naitung 02: Ki khun ki hajar ka Seiñ Raij Jowai kiba dang bat iala ka niam tynrai, hynne ka sngi Ba-ar kila rakhe ia ka Lehniam Behdieñkhlam kaba shisien shisnem da kaba ialum ha ka shnong Loompyrdi Iongpiah, Jowai, kaba don marjan bad ka ophis treikam jong ka Seiñ Raij Jowai.
Ha kane ka sngi kala don ka prokram ia kaba la pyniaid da u President ka Seiñraij Jowai bad la ioh ruh ia ka jingkren na u Dolloi ka Elaka Jowai u Bah Puramon Kynjing.
Na ka shnong Iongpiah la sdang iaka jingiaid ban leit sha Iawmusiang ban leit shim ia ka Dieñkhlam bad nangne kila leit rah sha la ki jong ki jong ki shnong
Ia ki rangbah la synran da ki khynnah bad ki hep barit kiba la shad da kaba bud iaka sur kaba la mih na ka jingtem ia ka Bom, bisli bad kiwei kiwei, katba ki kynthei pat kila mih ban sakhi ia ka jingwan rah ia kine ki Dieñkhlam sha ka shnong ka jong ki.
Katba ki Khonraij (Shnong Chiliangraij) kila pdiang ia ki Khnong Blai bad la pynlong ia ka Suit Ka Shor da u Dolloi bad kiwei pat ki nongialam niam da kaba pyndonkam da ka ïad um.
Ka Behdeiñkhlam kan kut noh lashai ka sngi Balang ha kaba yn pynlong hapoh ka Aitnar bad u Myntri Rangbah ka jylla u Conrad Sangma yn long kum u kongsan ha katei ka jingrakhe.
