Shillong, Naitung 02: U Chairman ka Meghalaya State Health Advisory (MSHA) u Bah Mayralborn Syiem ha ka sngi Nyngkong, ula lum ka jingialang bishar kam halor ka jinglong jingman ki jaka sumar ha Ri Bhoi district khamtam ha Nongpoh constituency.
Haba kren shaki lad pathai khubor, u Bah Mayralborn ula iathuh ba haka jingialang la iakren halor ka jingdonkam ban pynbha bad kyntiew iaki jingdonkam haki jaka sumar bad haka juh ka por ban kyntiew kyrdan iaki sub-centres shaki Primary Health Centres (PHCs).
“Nga la iakren halor ka jingdawa kyntiew kyrdan iaka Umshken sub centre sha ka PHC bad ia kane yn shim ha une snem mang tyngka. Nga la iakren ruh bad ka Myntri ka tnat ka koit ka khiah, bad u Myntri Rangbah ba khmih iaka tnat pla tyngka ban pynthikna ban shim rai halor kane” ong u Bah Mayralborn.
U MLA ka Nongpoh ula pyntip bala iakren ruh halor ka jingdonkam ban thaw sub centre ha Mawlong, Nongpoh Proper, Umrang, Sohkhwai bad Sakhoikuna.
Haba pynpaw iaki jingdonkam ha Nongpoh Civil Hospital, u Bah Mayralborn ula ong “Nga la ioh jingujor naki paidbah bad kum u nongmihkhmat nga la bthah iaki heh ophisar ban pynsted noh ia ka jingpyndait iaki tiar ba donkam kum ka CT scan, dialysis centre, ban pynbha iaka ultrasound kaba dei naka bynta ban sumar iaki longkmie ba armet man ka sngi ha Nongpoh Hospital.”
Haba iadei bad ka jingpynkylluid iaka Nongpoh, u Bah Mayralborn ula ong “Ka donkam ban kynriah iaka jaka sah ki nongtrei sha kawei ka jaka. Nga ka kyrpad iaki nongialam shnong, ki Rangbah Shnong ban synniang naka bynta ban kynriah iaka jaka sah ba marjan bad ka Hospital hapoh 5 km bad ka Nongpoh town, khnang ban pynheh iaka Hospital”.
“Ngi kyrmen ba ki nongialam shnong ba kin ai jaka khnang ban kynriah iaka jaka sah bad kane kan dei naka bynta ban pynheh iaka Hospital naka 100 jingthiah shaka 200 ne 250 tylli jingthiah khnang baka Ri-bhoi kaba dei ka aspirational district, kan ioh ban jam katkum ka kyndon ka NITI Ayog kaba kdew ba ki district hospital kiba hap hapoh ka aspirational district, kidei ban don 200 ne 250 jingthiah hospital ban kyntiew shaka medical college” ula ong.
“Haduh mynta ngim don bun jingthiah, ngi dang leh iaka ba donkam ban wad ki lad lynti bad nga ai khublei iaka Sorkar, iaka Myntri bad iaki ophisar kiba la trei shitom bad nga ngeit ba haki sngi ban wan, kine kin sa urlong” ula ong.
Haba kylli, u Bah Mayralborn ula ong “Ka NITI Ayog kala buh iaki kyndon haba iadei bad ka jingithuh ban tei iaki Medical College, ki district hospital kidei ban don 200-250 jingthiah hynrei haduh mynta ha Nongpoh ngim pat don, ngi don tang 100 jingthiha”.
“Namar baka Ri-bhoi kadei ka aspirational District, ngi don ka hok ban ioh hynrei ngim pat lah ban kot katkum ki kyndon ka NITI Ayog, ngi donkam ban pynkhreh ialade ban ioh ka hok ban dawa medical college” ula ong.
