Shillong, Naitung 02: U MP ka Voice of the People Party (VPP) na Shillong Dr Ricky AJ Syngkon, ula kyntu ia ka Sorkar Pdeng ba kan tuklar lem noh ha kaban shna pynbha noh ia ka National Highway-06 ha Meghalaya.
Haba aiti ia ka dorkhas sha u Myntri ka Road Transport & Highway Nitin Jairam Gadkari ha ka 1 tarik Naitung, u Dr Syngkon ula ong “Nga kyrpad ia ka Ophis jong phi ban sngewbha tuklar bad shim mardor ia ki sienjam ba donkam halor kane ka kam khnang ba kan weng ia ka jingeh jong ki paidbah ka Jylla bala kdew haneng”.
Ula ong ba ka NH-06 ka dei ka surok ba kongsan bha kaba iaid lyngba ka Jylla Meghalaya, Assam, Tripura bad Mizoram.
Ka surok NH-06 ka pyniasoh ia ki Sor kiba kongsan ha kine ki 4 tylli ki Jylla ba kynthup ia ka Jorabat, Shillong, Jowai, Silchar, Aizawl, Agartala bad kut hajan ka khappud India-Myanmar.
U Dr Syngkon ula ong ba ki bynta jong ka surok kiba hap hapoh ka East Jaintia Hills District ka dei kaba la jot rathai bha khamtam ha ki bynta naduh Jowai haduh Ratacherra ha kaba ki nongleit nongwan ki hap ban mad ia ka jingsohsat tang na ka jingsniew ka surok.
“Ka jinglong jingman kala nang sniew shuh shuh ha ka por lyiur bad ki briew ki ju sahkut da ki sngi ha surok ban poi sha ka jaka ba ki thmu ban leit. Kane kala iaid la katto katne snem bad kala wanrah ia ki jingeh ba khraw na ka jingduh kamai kajih bad wat ka jingduh ki mynsiem briew” ula ong.
